25 მაისის მთავრობის სხდომაზე, შრომის უსაფრთხოების შესახებ კანონპროექტი წარადგინა ჯანდაცვის სამინისტრომ.

ჯანდაცვის მინისტრ, დავით სერგეენკოს განცხადებით, პროექტში მკაფიოდაა გაწერილი შრომის უსაფრთხოების ნორმები და ამ ნორმების დაცვაზე პასუხისმგებელი სტრუქტურები. მისივე თქმით, გაწერილია რომელ ინდუსტრიაში რა სახის უსაფრთხოება ვრცელდება, გაწერილია სანქციები, რომლებიც ამ ნორმების შეუსრულებლობას მოჰყვება:

"კანონპროექტის მიღების შემთხვევაში, შრომის ინსპექციას გაუჩნდება ახალი შესაძლებლობები, რომ გაფრთხილების გარეშე, როგორც გეგმიურად, ასევე, არაგეგმიური შესვლაც განახორციელოს და მათი დასკვნა იქნება შესასრულებლად სავალდებულო".

კანონპროექტის განმარტებით ბარათში წერია, რომ მისი მიღებით, ახლებურად განისაზღვრება სამუშაო ადგილზე ადმინისტრაციული პასუხისმგებლობის ფარგლები შესაბამისი დარღვევისთვის, როგორც ფიზიკური, ასევე იურიდიული პირებისთვის.

მოქმედ შრომის კოდექსში არ არის მითითებული, თუ ვინ არის კოდექსის შესრულებაზე ზედამხედველი, ჯანდაცვის სამინისტროს პროექტით კი, როგორც შრომის უფლებებზე, ისე შრომის პირობების უსაფრთხოებაზე, პასუხისმგებელი იქნება შრომის ჯანდაცვისა და სოციალური დაცვის სამინისტრო.

დღეს, შრომის ინსპექცია მხოლოდ შრომის უსაფრთხოების ნაწილში მუშაობს და და მისი მანდატი არ ვრცელდება შრომის უფლებების ისეთ კომპონენტებზე, როგორიცაა ხელშეკრულების პირობები, ანაზღაურება და ა.შ. ასევე, ინსპექტორებს არ შეუძლიათ სავალდებულო მონიტორინგის ჩატარება, თუკი საქმე არ ეხება შრომით ექსპლუატაციას, ტრეფიკინგს. ასევე მათ არ აქვთ სანქციის გატარების უფლებამოსილება.

ამ თემაზე ვრცლად შეგიძლიათ წაიკითხოთ აქ.