ონლაინ შოპინგი ნებისმიერი ადამიანისთვის მოსახერხებელია. ასე სასურველი ნივთის შეძენა სწრაფად, მარტივად და სახლიდან გაუსვლელად შეგვიძლია, შენაძენი კი პირდაპირ სახლის კარამდე მოაქვთ, მაგრამ კიბერთაღლითების სატყუარაზე წამოგების რისკები აუცილებლად უნდა გავითვალისწინოთ და ონლაინ სივრცეში მაქსიმალურად ფრთხილად ვიყოთ.

Mymarket ონლაინ ვაჭრობის ყველაზე დიდი ქართული პლატფორმაა, რომელიც მომხმარებლებს ახალი თუ მეორადი ნივთების ყიდვისა და გაყიდვის შესაძლებლობას სთავაზობს. ამიტომ, გასაკვირი არაა, რომ კიბერთაღლითები პლატფორმის მომხმარებლების მოტყუებას მიმზიდველი შეთავაზებებით ცდილობენ.

Mymarket დაცული პლატფორმაა, რომელზე ვაჭრობაც უსაფრთხოდ შეგიძლიათ, მაგრამ აუცილებლად უნდა გაიგოთ ფიშინგის ახალი, შეფარული მეთოდების შესახებ და გაითვალისწინოთ რჩევები, რომლებიც ონლაინ სივრცეში დაგაზღვევთ.

რა მეთოდს იყენებენ კიბერთაღლითები Mymarket-ის მომხმარებლების სატყუარაზე წამოსაგებად

Mymarket-ის დახმარებით მომხმარებლებს დამატებითი ფულის გამომუშავება მარტივად, სახლიდან გაუსვლელად შეუძლიათ, ამიტომ კიბერთაღლითებმა შეიმუშავეს მეთოდი, რომლითაც ინიღბებიან და სარგებლის მიღებას ცდილობენ.

თაღლითები უკავშირდებიან მომხმარებელს, რომელსაც ვებგვერდზე გასაყიდი ნივთი აქვს განთავსებული, უგზავნიან ლინკს და ატყუებენ, რომ აღნიშნულ ბმულზე გადასვლა თანხის ჩარიცხვისა და მიტანის სერვისით სარგებლობისთვის არის საჭირო. ლინკზე გადასვლის შემდეგ, მომხმარებელი ხედავს ველს — თანხის მიღება — რომელზე გადასვლის შემდეგ ბანკის არჩევასა და ანგარიშის ნომრის მითითებას ითხოვენ, გადახდის სქემას ფიშერებმა კიდევ ერთი ფანჯარა დაამატეს, რომელიც იუზერნეიმსა და პაროლს ითხოვს — ეს ის სახიფათო ნაბიჯია, რომელიც თქვენს ფინანსებს საფრთხეს უქმნის, ამიტომ აღნიშნულის მოთხოვნის შემთხვევაში ოპერაცია აუცილებლად უნდა შეწყვიტოთ.

თუ Mymarket-ის მომხმარებელი ხართ, ნივთის გაყიდვა ან ყიდვა გინდათ და პლატფორმის სახელით შეტყობინებას მიიღებთ, რომლითაც ლინკზე გადასვლას ან სპეციალური ფორმის შევსებას გთხოვენ, სატყუარაზე არ წამოეგოთ და გაითვალისწინეთ რჩევები, რომლებიც უსაფრთხო ვაჭრობის გარანტია.

როგორ ვივაჭროთ Mymarket-ზე უსაფრთხოდ

ყველაფერი იმის იდენტიფიცირებით იწყება, სანდო ვებგვერდს ვიყენებთ თუ — არა.

ვებგვერდის მისამართის ველისთვის ყურადღების მიქცევა უსაფრთხოდ ვაჭრობის, თუნდაც, უბრალოდ ონლაინ სივრცეში გადაადგილების პირველი საფეხურია: მისამართი https:// პრეფიქსით უნდა იწყებოდეს, რომლის მარცხნივ აუცილებლად ბოქლომის გამოსახულება უნდა იყოს.

როდესაც ვებგვერდის მისამართს გადაამოწმებთ და მის სანდოობაში დარწმუნდებით, ონლაინ თავდაცვის პირველი საფეხური უკვე გავლილი გექნებათ, თუმცა აუცილებელია დამატებითი ზომების მიღებაც.

ისარგებლეთ მხოლოდ ვებგვერდით — არ გადახვიდეთ პლატფორმის ჩატში მიღებულ ლინკზე, არ ენდოთ ტელეფონის ნომერზე გამოგზავნილ შეტყობინებებს თუ ელექტრონული ფოსტით მიღებულ გზავნილს. Mymarket-ზე ვაჭრობა ბევრად მარტივია და ამისთვის ვებგვერდის დატოვება და დამატებითი ოპერაციის განხორციელება არ გიწევთ.

პლატფორმა თქვენს მონაცემებს საგულდაგულოდ იცავს და თუ ნივთს ყიდით, ერთადერთი ინფორმაცია, რომელიც გასაყიდი ნივთის საფასურის მისაღებად სხვას უნდა გაუზიაროთ, საბანკო ანგარიშის ნომერია.

თუ სტატიაში ჩამოთვლილ უსაფრთხოების წესებს გაითვალისწინებთ Mymarket-ზე და სხვა ონლაინ მაღაზიებში უსაფრთხოდ და კომფორტულად ვაჭრობას შეძლებთ.