12 ივნისს დინამო არენას ცნობილი რეპერი და შემსრულებელი, YE, იგივე კანიე ვესტი ეწვევა. კონცერტი საქართველოს მთავრობის მიერ მხარდაჭერილი კამპანიის, Starring Georgia-ის, ფარგლებში იმართება. კამპანიის ფარგლებში მსოფლიო ვარსკვლავების კონცერტები სახელმწიფო სუბსიდირებით ტარდება.

კანიე 24 გრემის ჯილდოთი, 150 მილიონზე მეტი გაყიდული ალბომითა და უამრავი დაუვიწყარი კონცერტით 21-ე საუკუნის ერთ-ერთი ყველაზე გავლენიანი მუსიკალური არტისტია.

2026 წელს მომღერალმა ახალი ალბომი, Bully, გამოუშვა. ალბომის მხარდასაჭერად რეპერი კონცერტებს მართავს — ლოს-ანჯელესის კონცერტზე კანიე დედამიწის ფორმის სცენაზე გამოვიდა, რაც თანამედროვე მუსიკალური კულტურის ერთ-ერთი ყველაზე განხილვადი შესრულება გახდა.

ფოტო: Philip Cheung

12 ივნისს ვესტი მსგავს შოუს თბილისის დინამო არენაზე მყოფ მსმენელებს შესთავაზებს. ბილეთების გაყიდვა 12 მაისს, 12:00 საათზე, tkt.ge-ზე დაიწყება. YE-ს პერფორმანსის შესახებ ინფორმაციას STARRING GEORGIA ავრცელებს.

რამდენიმე მსმენელს ექნება შესაძლებლობა, რომ კანიეს კონცერტს უფასოდ დაესწროს. ამისთვის შემდეგი ნაბიჯის გადადგმაა საჭირო:

  1. გადადით ამ ბმულზე და გაიარეთ რეგისტრაცია;
  2. შეინახეთ Bully, კანიეს ახალი ალბომი, Spotify-სა და Apple Music-ზე.

ამის შემდეგ თქვენი რეგისტრაცია წარმატებულად ჩაითვლება. დარეგისტრირებულთა სიიდან შეირჩევა რამდენიმე ადამიანი, რომელსაც YE-ს კონცერტის უფასო ბილეთი გადაეცემა.

შეგახსენებთ, რომ ანტისემიტური, რასისტული და პრო-ნაცისტური კომენტარების გამო, პოლონეთში კანიე ვესტის კონცერტი ცოტა ხნის წინ გაუქმდა. კონცერტის გაუქმების შესახებ ინფორმაცია მას შემდეგ გავრცელდა, რაც ვესტმა საფრანგეთში დაგეგმილი კონცერტი გააუქმა, ხოლო დიდმა ბრიტანეთმა მას ქვეყანაში შესვლა აუკრძალა.