შეზღუდული შესაძლებლობის მქონე პირებმა ღია საზოგადოების ფონდის ოფისში პრესკონფერენცია გამართეს და განაცხადეს, რომ მათი სიმშვიდის ერთადერთი გარანტია ევროპული ღირებულებები და სივრცეა, სადაც ადამიანებს პატივს სცემენ, არიან რეალიზებული და აღიარებული. მათ პასუხისმგებელ პირებს მოუწოდეს, გააკეთონ ყველაფერი სიტუაციის გამოსასწორებლად.

რატომ არის მნიშვნელოვანი: ასოცირებული ტრიოს ქვეყნებს შორის, საქართველო ერთადერთია, რომელმაც ევროკავშირის კანდიდატის წევრობის სტატუსზე ევროკომისიისგან რეკომენდაცია ვერ მიიღო.

  • კომისიამ ქვეყნისთვის მხოლოდ ევროპული პერსპექტივის მინიჭების რეკომენდაცია გასცა და ის მოთხოვნები ჩამოთვალა, რომელიც კანდიდატობის მიღებამდე უნდა შესრულდეს.
  • არსებობს მოლოდინი, რომ 24 ივნისს საბოლოო გადაწყვეტილებაზე ევროპარლამენტის რეზოლუცია და ევროკომისიის რეკომენდაცია აისახება.

რა თქვეს პრესკონფერენციაზე: იმედი გამოთქვეს, რომ ევროპის კარი არ დაიკეტება დიდი ხნით და განმარტეს, რომ ეს იქნება კატასტროფა შშმ პირებისთვის.

  • "ევროპასთან ინტეგრაციის დაჩქარება ჩვენთვის სასიცოცხლოდ მნიშვნელოვანია. [...] ახლა, როგორც ჩანს, დაჩქარება კი არა, შეიძლება, უფრო დავშორდეთ ჩვენ ამ პერსპექტივას, რაც ძალიან შემაშფოთებელია ჩვენი თემისთვის, იმიტომ, რომ აღმოვჩნდებით ისევ ქველმოქმედების და დახმარების იმედად".
  • "მივმართავ ყველას, ვისაც შეუძლია, თუნდაც ერთი ნაბიჯი გადადგათ. ოღონდ ერთი ნაბიჯი არავითარ შემთხვევაში უკან აღარ დაგვრჩა, არცერთი მილიმეტრი უკან დასახევი აღარ გვაქვს. ყველა ნაბიჯი, რომელიც უკან შეიძლებოდა გადადგმულიყო, გადადგმულია".

რას მოგვიწოდებს ევროკომისია: დასკვნაში წერია, რომ ეკონომიკურ, პოლიტიკურ და საზოგადოებრივ ცხოვრებაში პირადი ინტერესების ჭარბი გავლენების აღმოფხვრით საქართველომ "დეოლიგარქიზაციის" ვალდებულება უნდა აიღოს.

  • მათივე განცხადებით, აუცილებელია თავისუფალი, პროფესიონალური, პლურალისტული და დამოუკიდებელი მედიაგარემო ჟურნალისტებისთვის.
  • ევროკომისია მოითხოვს, გაძლიერდეს გენდერული თანასწორობა და ბრძოლა ქალთა მიმართ ძალადობის წინააღმდეგ;
  • შეფასებაში განხილულია, რომ 2021 წლის ივლისის მოვლენების გათვალისწინებით, საქართველოში LGBTQ+ თემის დასაცავად მეტი უნდა გაკეთდეს;

გარდა ამისა, ევროკომისია ამბობს, რომ საჭიროა ქვეყანაში პოლიტიკური პოლარიზაცია უნდა დასრულდეს და შესრულდეს შარლ მიშელის შეთანხმება, რომელიც ევროკავშირის შუამდგომლობით შედგა.

  • ასევე, მიიღონ გადაწყვეტილება, რათა სასამართლოებმა განხილვისას პროაქტიულად გაითვალისწინონ ადამიანის უფლებათა ევროპული სასამართლოს გადაწყვეტილებები;
  • ახალი სახალხო დამცველის წარდგენისას უპირატესობა დამოუკიდებელ პირს მიენიჭოს, ხოლო პროცესი გამჭვირვალედ წარიმართოს.
  • კომისია საქართველოს პროგრესს 2022 წლის ბოლომდე დააკვირდება.