პოლონეთის საგარეო საქმეთა სამინისტროს წარმომადგენელი, პიოტრ ვავჟიკი ამბობს, რომ როგორი ქვეყანაც არის რუსეთი, ისეთი ელჩი ჰყავთ. მისივე თქმით, პოლონეთში რუსეთის ელჩი მოსკოვის ბრძანებების მიხედვით მოქმედებს და მისი ქმედებები პროვოკაციად უნდა იყოს განხილული.

"რა ქვეყანაცაა, ისეთი ელჩი ჰყავთ. სერგეი ანდრეევი რუსეთის წარმომადგენელია და ის მოსკოვის ბრძანებების მიხედვით მოქმედებს, ამიტომ მისი ქმედებები უნდა იყოს აღქმული, როგორც პროვოკაცია", — განაცხადა მან.

მისივე თქმით, პოლონეთის მხრიდან უკრაინისადმი გაწეული დახმარების გამო ქვეყანა ურიცხვი პროპაგანდის, დეზინფორმაციული თავდასხმებისა და პროვოკაციული ქმედებების სამიზნე გახდა.

ვავჟიკის განცხადებით, მათ არაერთხელ დაიბარეს ანდრეევი საგარეო საქმეთა სამინისტროში, რათა აეხსნა მისი ქმედებები და განცხადებები.

9 მაისს საბჭოთა ჯარისკაცების მემორიალთან პოლონეთში რუსეთის ელჩს წითელი საღებავი შეასხეს. ინციდენტის შემდეგ ანდრეევმა განაცხადა, რომ ის ამაყობს თავისი ქვეყნითა და პრეზიდენტით.