Financial Times-ის ცნობით, ევროკავშირი რუსეთის წინააღმდეგ სანქციების მე-6 პაკეტში ცვლილებების შეტანას გეგმავს. კერძოდ, როგორც მედია წერს, ბრიუსელი აპირებს შეაჩეროს წინადადება, რომლის თანახმადაც, ევროკავშირის გადაზიდვის ინდუსტრიას რუსული ნედლი ნავთობის გადატანა აეკრძალებოდა.

გამოცემა აღნიშნავს, რომ წარმოდგენილ წინადადებაზე, რომელიც საზღვაო გადაზიდვას ეხებოდა, მალტასა და საბერძნეთის მხრიდან მტკიცე ლობირების შემდეგ, ევროკავშირი უარს იტყვის. პარალელურად კი, უნგრეთი არ ცვლის პოზიციას და კვლავ მყარად ეწინააღმდეგება ევროკავშირის მიერ რუსულ ნავთობზე ემბარგოს.

FT-ის ცნობით, ევროკავშირმა ასევე წარადგინა წინადადება, რომელიც ევროპულ კომპანიებს აუკრძალავდა სხვადსხვა სერვისის გაწევას, მათ შორის, დაზღვევას, რომელიც რუსული ნავთობის მსოფლიოს გარშემო ტრანსპორტირებისთვის არის საჭირო. მედიის განცხადებით, მოსალოდნელია, რომ ახალ პაკეტში ეს პირობა შენარჩუნდება.

6 მაისს ევროკომისიის პრეზიდენტმა, ურსულა ფონ დერ ლაიენმა სანქციების მეექვსე პაკეტი წარადგინა. მისი თქმით, სანქცირებულთა სიაში იქნებიან ის სამხედრო ოფიცრები, რომლებმაც ბუჩაში ომის დანაშაულები ჩაიდინეს. ამასთან, ლაიენმა აღნიშნა, რომ აპირებენ რუსული ნავთობის იმპორტის ეტაპობრივად გაუქმებას, რათა ზეწოლა რუსეთზე გაიზარდოს.