დაბადების დღეზე, როგორც წესი, მხოლოდ მიწვეული სტუმრები მიდიან ხოლმე, ამიტომ, მასპინძელ იუბილარს ყოველთვის წინასწარ აქვს გათვლილი, რა რაოდენობის სასუსნავი დასჭირდება. თუმცა, ფლორიდაში მცხოვრებ ოჯახს საიუბილეო წვეულებამდე დაუპატიჟებელი სტუმარი ეწვია და საკვების მარაგსაც თავადვე მიაგნო.

როცა კერინ და ჯეიმი დობსონებმა ავტოფარეხიდან საეჭვო ხმა გაიგონეს, სიტუაციის გასარკვევად გაემართნენ და კარი გააღეს. სათავსოში შეხედვისას ისინი თვალებს არ უჯერებდნენ — მათ იქ ორმეტრნახევრიანი ალიგატორი დახვდათ, რომელიც ძირს გადმოყრილ ქილებს შორის მშვიდად მიიზლაზნებოდა.

საქმე ისაა, რომ წყვილმა კერინის დაბადების დღის წვეულებისთვის რამდენიმე ქილა გაზიანი სასმელი იყიდა, თუმცა, ნაადრევ სტუმარს თავპატიჟი არ გამოუდია და დიეტური კოკა-კოლის დაგემოვნება გადაწყვიტა.

"ყველგან დიეტური კოკა-კოლა იყო დაღვრილი, რადგან ალიგატორმა შეფუთვა გახსნა და რამდენიმე ქილა მიირთვა", — ჰყვება კერინი, — "ალბათ ლუდი ეგონა".

როგორც ჩანს, ალიგატორი სათავსოში მაშინ შევიდა, როცა წყვილი სეირნობიდან დაბრუნდა და ავტოფარეხის კარის დაკეტვა დაავიწყდა. დობსონების თქმით, ისინი ფლორიდაში ჩიკაგოდან ცოტა ხნის წინ გადავიდნენ საცხოვრებლად, ამიტომ კარის ღიად დატოვების საფრთხეზე არაფერი იცოდნენ.

საბოლოოდ, ალიგატორი დაიჭირეს და დაუსახლებელ ზონაში გაუშვეს.

რეპტილიების ეს სახეობა დასახლებულ ადგილებში ძირითადად დაწყვილების სეზონზე — აპრილიდან ივნისამდე — ხვდება ხოლმე, როცა ისინი ჭაობებს ტოვებენ და პარტნიორის მოსაძებნად მიდიან. თუმცა, ველური ბუნების მკვლევრების თქმით, ადამიანებს საფრთხე იშვიათად ექმნებათ.

"ალიგატორები იშვიათად კბენენ ადამიანებს", — წერია ფლორიდის ველური ბუნების კომისიის ანგარიშში, — "მდედრი ალიგატორები თავიანთი საცხოვრებლის დასაცავად დაუპატიჟებელ სტუმრებს სისინითა და პირის გაღებით აშინებენ, თუმცა, მათ იშვიათად ესხმიან თავს. ალიგატორები სხვებს, ძირითადად, წყალში ან მის მახლობლად კბენენ".