საქართველოში გერმანიის საელჩოს განცხადებით, 28 აპრილს ბუნდესტაგმა მიიღო რეზოლუცია, სადაც ის უკრაინის, მოლდოვასა და საქართველოს ევროპულ გზაზე მხარდაჭერას აფიქსირებს.

"ბუნდესთაგი ადასტურებს უკრაინის, მოლდოვას და საქართველოს მხარდაჭერას "მათ ევროპულ გზაზე". პარლამენტის აზრით, ევროკავშირის შესახებ ხელშეკრულების 49-ე მუხლის კრიტერიუმების შესრულება ევროკავშირში წევრობის წინაპირობას წარმოადგენს", — აცხადებს საელჩო.

მათივე ცნობით, რეზოლუციაში პარლამენტი მხარს უჭერს გერმანიის ფედერალური მთავრობის დახმარებას უკრაინისათვის, რომელიც ასევე მოიცავს მძიმე შეიარაღების მიწოდებას.

საქართველოს ევროკავშირს წევრობის შევსებული კითხვარის პირველი ნაწილი დღეს გადასცა. როგორც პრემიერმინისტრმა, ირაკლი ღარიბაშვილმა აღნიშნა, მეორე ნაწილი 13 მაისამდე იქნება მზად. საქართველოს ევროკავშირის წევრობის კითხვარი 11 აპრილს გადასცეს. ქვეყანამ ევროკავშირის წევრობის კანდიდატის სტატუსის მიღებაზე განაცხადს ხელი 3 მარტს მოაწერა.