უზენაესი სასამართლოს თავმჯდომარე, ნინო გვენეტაძე, On.ge-ს მიერ დასმული კითხვის პასუხად ამბობს, რომ მოსამართლეთა კრიტიკას არავინ ზღუდავს:

"კრიტიკა დაშვებულია. დაშვებული არ არის ზღვარგადასული კრიტიკა, რომელიც შეურაცხყოფაში გადადის. ჩვენს განცხადებას თუ ყურადღებით ჩაიკითხავთ, არავითარ სანქციაზე საუბარი არ არის."

გვენეტაძე ასევე აღნიშნავს, რომ სასამართლო და მოსამართლე ნამდვილად არის უნარიანი, რომ არ მოექცეს კრიტიკის გავლენის ქვეშ და გადაწყვეტილება მიიღოს დამოუკიდებლად.

იუსტიციის უმაღლესმა საბჭომ 26 აპრილს საჯარო განცხადება გაავრცელა. წერილის ადრესატი, ზოგადად, მედიასთან ერთად, იყო საქართველოს ჟურნალისტური ეთიკის ქარტია. იუსტიციის უმაღლესი საბჭო „გამოხატვის თავისუფლების ფარგლების სავარაუდო დარღვევის ფაქტებზე“ ქარტიის რეაგირებას ითხოვს. ამავე განცხადებაში წერია, რომ იუსტიციის უმაღლესი საბჭო დაუშვებლად მიიჩნევს მოსამართლეთა მიმართ იმ კრიტიკულ გამონათქვამებს, რაც ბოლო პერიოდში, მათ მიმართ, რუსთავი 2-ის ეთერით ჟღერდებოდა. საბჭომ ქარტიას სწორედ ამ კრიტიკული გამონათქვამების შეფასებისკენ მოუწოდა. ასევე, იუსტიციის საბჭოს მოსაზრებით, ჟურნალისტები უნდა იცავდნენ "თვითცენზურის ვალდებულებას". ამავე წერილში აღნიშნულია ისიც, რომ ეთიკური პრინციპების დარღვევის გამო, ეთიკის ქარტია არ ითვალისწინებს ჟურნალისტისთვის სანქციის დაწესებას.

იუსტიციის უმაღლესი საბჭოს განცხადებაში ასევე აღნიშნულია:" საბჭოს მიაჩია, რომ სასამართლოსა და მოსამართლეების კრიტიკა მკვეთრად უნდა გაიმიჯნოს მათი შეურაცხყოფის, ლანძღვის, დამცირების, მათდამი სიძულვილის გავრცელებისა თუ მათი დაშინებისგან, ასევე სასამართლოს გადაწყვეტილებისადმი დაუმორჩილებლობის განცხადებებისაგან. გამოხატვის თავისუფლების ამგვარი გამოვლინებანი შორს სცილდება არა მარტო სასამართლოს „დასაშვები კრიტიკის“ ფარგლებს, არამედ, გამოხატვის თავისუფლების საერთო ფარგლებსაც, რომელთა გადალხვის შემდეგაც მისი შეზღუდვის აუცილებლობა წარმოიშობა."

ჟურნალისტური ეთიკის ქარტიამ, იუსტიციის უმაღლესი საბჭოს აღნიშნული განცხადება ცენზურის დაწესების მცდელობად მიიჩნია.

"იუსტიციის უმაღლესი საბჭოს წუხილი, რომ ჟურნალისტები „დასაშვები კრიტიკის“ და „გამოხატვის თავისუფლების“ ფარგლებს სცილდებიან, მიუღებელია ქარტიისთვის. ქვეყანაში არსებობს გამოხატვის თავისუფლების მაღალი სტანდარტი, რომლის დაცვა და შენარჩუნება სასიცოცხლოდ აუცილებელია მედიის თავისუფლებისთვის. შესაბამისად, ნებისმიერი ინიციატივა, რომელიც რაიმე ფორმით შეზღუდავს გამოხატვის თავისუფლებას, არსებული სტანდარტის გაუარესება იქნება," - აცხადებს ქარტია.