ქართული ოცნების თავმჯდომარე, ირაკლი კობახიძე ამბობს, რომ უკრაინის ხელისუფლების განცხადება კონტრაბანდის შესახებ ჰაერიდან იყო მოტანილი. კობახიძემ, ასევე, თქვა, რომ ეს განცხადება პოლიტიკურად მოტივირებული იყო.

"ჩვენ გვქონდა მყისიერი რეაქცია იმ განცხადებაზე, რომელიც გაკეთდა უკრაინის ხელისუფლების წარმომადგენლების მხრიდან და რეაქცია იყო ძალიან მარტივი. ჩვენ მოვითხოვეთ მათი მხრიდან მტკიცებულებების წარმოდგენა, წყაროს წარმოდგენა, თუმცა არც ერთი და არც მეორე არ გაუკეთებიათ. ამას აქვს მარტივი მიზეზი. საერთოდ ჰაერიდან იყო მოტანილი ის განცხადება, რომელიც მოვისმინეთ და არაფერი არ მომხდარა ისეთი, რაზეც შეიძლებოდა აგებული ყოფილიყო ეს განცხადება. იყო აბსოლუტურად პოლიტიკურად მოტივირებული განცხადება, როელიც შეიძლება იყო გათვლილი, რომ არის გარკვეული კოორდინაცია, ამაზე ჩვენ ხშირად გვისაუბრია, აქაურ რადიკალურ ოპოზიციასთან.

გათვლილი იყო მარტივ რამეზე, რომ რაღაც შეიძლება პატარა მინიაფეთქება მოჰყოლოდა საზოგადოებაში ამ განცხადებას, თუმცა საზოგადოება ხედავს ყველაფერს და საზოგადოება აფასებს იმას, თუ რა ხდება სინამდვილეში", — თქვა მან იმედის ეთერში.

მისივე თქმით, ის, რომ რამდენიმე დღის განმავლობაში უკრაინული მხარისგან არ იუღიათ ინფორმაცია, თავისთავად მეტყველებს იმაზე, რომ ეს განცხადება არ ეფუძნებოდა არაფერს.

"სინამდვილეში არ მომხდარა არაფერი. ჩვეულებრივად კონტროლდება აბსოლუტურად ყველა ტვირთი, რაც გადის ქვეყნიდან, რაც შემოდის ქვეყანაში და აბსოლუტურად ღია არის, ბუნებრივია, ყველა ინფორმაცია ამასთან დაკავშირებით. ის, რომ ამდენი დღის განმავლობაში ჩვენ ვერ მივიღეთ ვერანაირი ინფორმაცია უკრაინული მხრიდან თავისთავად მეტყველებს იმაზე, რომ არაფერს ეს არ ეფუძნებოდა და თავიდან ბოლომდე იყო სამწუხაროდ, ე.წ. ფეიკი და ფეიკის დიდოსტატები ვინ არიან ჩვენ კარგად ვიცით. ესენი არიან ჩვენი ოპოზიციონერები, რომლებიც იქ არიან, სამწუხაროდ, დღესაც ხელისუფლებაში", — ამბობს კობახიძე.

უკრაინის დაზვერვა აცხადებს, რომ რუსეთი ცდილობს საქართველოს ტერიტორიიდან კონტრაბანდული საქონლის შეტანას, რაშიც საქართველოს მთავრობა ხელს უწყობს. მათი ინფორმაციით, ქართულმა სპეცსამსახურებმა მიიღეს დავალება პოლიტიკური პირებისგან, არ ჩარეულიყვნენ ამ საკითხში.

პასუხად ფინანსთა სამინისტრომ განაცხადა, რომ ეს დაუსაბუთებელი და აბსურდული ბრალდებაა. უწყების თქმით, რუსეთისთვის სანქციების დაწესების დღიდან საქართველო ახორციელებს უმკაცრეს კონტროლს ქვეყნის ყველა საბაჟო პუნქტზე.

ქართული ოცნების თავმჯდომარემ, ირაკლი კობახიძემ კი უკრაინის განცხადებას ალოგიკური უწოდა. მან ამ შემთხვევაშიც ნაციონალური მოძრაობის როლზე ისაუბრა და თქვა, რომ ადამიანები, რომლებიც საქართველოში ოპოზიციაში არია, უკრაინის ხელისუფლების ნაწილი არიან.

ამავე თემაზე: