რუსეთის საგარეო საქმეთა მინისტრი მოლაპარაკებების საკითხზე უკრაინას აკრიტიკებს. ლავროვის მტკიცებით, გუშინ უკრაინულმა მხარემ მოლაპარაკებების ჯგუფს წარუდგინა თავისი შეთანხმების პროექტი, რომელიც 29 მარტს სტამბოლში დაფიქსირებული ყველაზე მნიშვნელოვანი დებულებებიდან "გადახვევაა".

ლავროვის განცხადებას პროკლემლისტური მედიები ავრცელებენ, სადაც აღნიშნულია, რომ უკრაინამ შეცვალა წვრთნების ჩატარების დებულება და აღარ ახსენებს, რომ ამისთვის აუცილებელი იქნება რუსეთის ხელისუფლების თანხმობა. მათი მტკიცებით, სტამბულის დოკუმენტში ცალსახად ნათქვამია, რომ "ნეიტრალური, არაბლოკური, არაბირთვული სტატუსის კონტექსტში, ნებისმიერი სამხედრო წვრთნები უცხოური კონტიგენტების მონაწილეობით ტარდება მხოლოდ გარანტორი სახელმწიფოს, მათ შორის რუსეთის, თანხმობით".

"კიევის რეჟიმს აკონტროლებენ ვაშინგტონი და მისი მოკავშირეები, რომლებიც უბიძგებენ პრეზიდენტ ზელენსკის საომარი მოქმედებების გაგრძელებას" — თქვა ლავროვმა ტრადიციული პროპაგანდისტული ნარატივით და დაამატა, თითქოს "მიუხედავად ყველა პროვოკაციისა", მოლაპარაკებების პროცესი გაგრძელდება.

რამდენიმე უშედეგო, მათ შორის, რუსეთ-უკრაინის საგარეო საქმეთა მინისტრების შეხვედრის შემდეგ, შედარებით შედეგიანი მხოლოდ თურქეთში გამართული იყო. რეჯეფ თაიფ ერდოღანმა პირისპირ სასაუბროდ უკრაინის და რუსეთის პრეზიდენტები მიიწვია, თუმცა 29 მარტს სტამბულში ერთმანეთს დელეგაციები შეხვდნენ.

ამ ეტაპზე, მოლაპარაკებების მაგიდაზე რამდენიმე საკითხი დევს, მათ შორის, უკრაინის ნეიტრალიტეტი, ოკუპირებული ტერიტორიები და რუსეთის მიერ სამხედრო ოპერაციების შემცირება.