NATO-ს გენერალურმა მდივანმა, იენს სტოლტენებერგმა ჟურნალისტის კითხვის საპასუხოდ საქართველოზე ისაუბრა და აღნიშნა, რომ თუ რაიმე გაკვეთილი უნდა ისწავლონ რუსეთის მიერ უკრაინაში შეჭრით, ეს სწორედ ისეთი ქვეყნებისთვის დახმარების გაძლიერებაა, როგორიც საქართველოა.

"მჯერა, რომ ერთ-ერთი გაკვეთილი, რაც რუსეთის მიერ უკრაინაში შეჭრით უნდა ვისწავლოთ, ის არის, რომ მნიშვნელოვანია, ყველამ, ვისაც სჯერა დემოკრატიისა და კანონის უზენაესობის, უნდა უზრუნველყოს დახმარება ისეთი ახლო და ღირებული პარტნიორებისთვის, როგორიცაა საქართველო — უმჯობესია, მათ დავეხმაროთ ადრე, ვიდრე გვიან. ამიტომ, ერთ-ერთი საკითხი, რომელსაც დღეს და ხვალ განვიხილავთ, იქნება ის, თუ როგორ გავაძლიეროთ დახმარება იმ პარტნიორების მიმართ, რომლებიც რუსეთის ზეწოლის ქვეშ არიან და რა თქმა უნდა, საქართველოც ერთ-ერთია", — თქვა სტოლტენბერგმა.

ის, ასევე, ამბობს, რომ უკრაინაში რუსული ომი, შესაძლოა, თვეები ან წლები გაგრძელდეს, თუმცა მისი თქმით, ვლადიმერ პუტინს ჯარების გაყვანით და მოლაპარაკებების მაგიდასთან დაჯდომით ახლავე შეუძლია მისი დასრულება.

"უპირველეს ყოვლისა, ეს ომი ახლავე უნდა დასრულდეს. პრეზიდენტ პუტინს შეუძლია ამ ომის დასრულება მისი ჯარების გაყვანით და დამოუკიდებელ უკრაინაზე თავდასხმის შეწყვეტით. თუმცა, ამავე დროს, ჩვენ უნდა ვიყოთ რეალისტები და გავაანალიზოთ, რომ ეს, შესაძლოა, დიდ ხანს გაგრძელდეს, რამდენიმე თვე, ან შესაძლოა, წელიც. ამიტომ უნდა ვიყოთ მზად გრძელვადიანი პერსპექტივისთვის", — აღნიშნა მან.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში