მრავალი ჯილდოს მფლობელ ტეილორ სვიფტს ახალი პატივი ერგო — ავსტრალიაში ახლახან აღმოჩენილ მცენარიჭამია მწერების რამდენიმე სახეობას მომღერლის სახელი დაარქვეს.

მწერები კალიფორნიის უნივერსიტეტის მკვლევრებმა აღმოაჩინეს და 12 ახალი სახეობის შესახებ სტატია სამეცნიერო ჟურნალში გამოაქვეყნეს. მწერების ერთ-ერთ გვარს სვიფტიფილუსი (Swiftiephylus) უწოდეს. დასახელება ორი ნაწილისგან შედგება: Swiftie — ასე ეძახიან ტეილორ სვიფტის ფანებს და Phylus — სიტყვა, რომელიც ამ ჯგუფის მწერების სახელებში ხშირად გამოიყენება.

მწერების ოთხ ახალ სახეობას სახელი თავად მომღერლისა და მისი ცნობილი ალბომების შთაგონებით დაარქვეს: ესენია Swiftiephylus taylorae, Swiftiephylus amator, Swiftiephylus intrepidus და Swiftiephylus poetorum, რაც ტეილორის სახელისა და მისი პოპულარული ალბომების (Lover, Fearless და Poets) ლათინური თარგმანია.

კალიფორნიის უნივერსიტეტის მკვლევრების თქმით, აღმოჩენილი მწერები ძირითადად ავსტრალიურ ხეებსა და ბუჩქებზე ბინადრობენ. როგორც წესი, მწერები მთელ თავიანთ სიცოცხლეს — კვერცხიდან გამოჩეკით დაწყებული, გამრავლებით დამთავრებული — მხოლოდ ერთ კონკრეტულ მცენარეზე ატარებენ.

მწერებისთვის ტეილორ სვიფტის სახელის დარქმევა უნივერსიტეტის დოქტორანტმა, სარა შრედერმა გადაწყვიტა. მას იმედი აქვს, რომ მომღერლის პოპულარობა საზოგადოების ყურადღებას მიიპყრობს და ხელს შეუწყობს ცნობიერების ამაღლებას როგორც კონკრეტულად ამ მწერების გადარჩენის, ისე, ზოგადად, ბუნების დაცვის შესახებ.

ერთ-ერთი მიზეზი, რის გამოც შრედერმა ახალ მწერებს სვიფტის სახელი დაარქვა, მათი გარეგნობაა. დოქტორანტის თქმით, კრემისფერი და წითელი შეფერილობა მწერებს მცენარეების ყვავილებს შორის შენიღბვაში ეხმარება. მსგავსი ფერები ამავე მცენარეებზე მცხოვრებ სხვა, შორეულად მონათესავე მწერებშიც შეიმჩნევა, რაც იმაზე მიუთითებს, რომ შენიღბვის ეს ფორმა შესაძლოა ევოლუციის პროცესში რამდენჯერმე, დამოუკიდებლად წარმოქმნილიყო.

"ტეილორ სვიფტის სავიზიტო ბარათი მისი ქერა თმა და წითელი ტუჩებია. ეს მწერებიც ღია ყვითელი ფერის არიან და წითელი აქცენტები დაჰკრავთ. ამიტომ, სამეცნიერო ნაშრომში მე მათ 'ქერებადაც' კი მოვიხსენიებ", — აღნიშნავს შრედერი.

კალიფორნიის უნივერსიტეტის განმარტებით, ახლად აღმოჩენილი მწერები არც ადამიანებისთვის და არც ცხოველებისთვის საფრთხეს არ წარმოადგენენ. ისინი Miridae-ს — მცენარიჭამია ბაღლინჯოების ოჯახს მიეკუთვნებიან, რომელიც მსოფლიოში 11 000-ზე მეტ სახეობას ითვლის.

მიუხედავად იმისა, რომ მწერები მეცნიერებისთვის ახალი აღმოჩენაა, თავად ნიმუშები ოფიციალურ აღწერას ათწლეულების განმავლობაში ელოდა. ნიმუშები ჯერ კიდევ 1995-2004 წლებში შეაგროვეს ამერიკის ბუნების ისტორიის მუზეუმისა და ავსტრალიელი მეცნიერების ერთობლივი მასშტაბური ექსპედიციის დროს. ამ ექსპედიციის ფარგლებში 50 000-ზე მეტი სხვადასხვა ნიმუში მოიპოვეს, რომელთა დახარისხებას, დეტალურ შესწავლასა და კლასიფიკაციას წლები დასჭირდა.