რუსეთის ფედერალურმა უსაფრთხოების სამსახურმა (FSB), შინაგან საქმეთა სამინისტროსა და ეროვნული გვარდიის მონაწილეობით, ოპერაცია ჩაატარა იმ პირების წინააღმდეგ, რომლებსაც იარაღის უკანონო დამზადებასა და უკანონო ბრუნვაში მონაწილეობა ედებათ ბრალად. ინფორმაციას OC Media ავრცელებს.

FSB-ისა და შინაგან საქმეთა სამინისტროს საზოგადოებასთან ურთიერთობის ცენტრის განცხადებით, ორშაბათს, ოპერაციის ფარგლებში, რუსეთის 43 რეგიონში 111 ადამიანი დააკავეს. მათ შორის იყო ჩრდილოეთ კავკასიის ხუთი რესპუბლიკა — დაღესტანი, ჩრდილოეთი ოსეთი, ყაბარდო-ბალყარეთი, ყარაჩაი-ჩერქეზეთი და ადიღე.

FSB-ის ინფორმაციით, დაკავებულები იარაღის, საბრძოლო მასალისა და ასაფეთქებელი ნივთიერებების უკანონო დამზადებასა და გაყიდვაში, ასევე სამოქალაქო იარაღის საბრძოლო მდგომარეობაში აღდგენაში მონაწილეობდნენ. უწყების ცნობით, ქვეყნის მასშტაბით 37 არალეგალური სახელოსნოს საქმიანობა აღკვეთეს.

უსაფრთხოების სამსახურის ინფორმაციით, ამოღებულია სულ 297 ცეცხლსასროლი იარაღი, მათ შორის 11 ყუმბარმტყორცნი, ექვსი ტყვიამფრქვევი, ოთხი ავტომატი, ერთი საიერიშო შაშხანა, 74 ავტომატური შაშხანა, 77 პისტოლეტი და რევოლვერი, ასევე 124 შაშხანა, კარაბინი და სანადირო თოფი. FSB-ის ცნობით, ასევე ამოიღეს 223 ყუმბარა, 82.5 კილოგრამი ასაფეთქებელი ნივთიერება და 92 ათასი საბრძოლო ვაზნა.

უსაფრთხოების სამსახურს ჩრდილოეთ კავკასიაში დაკავებულების შესახებ დამატებითი დეტალები არ გაუვრცელებია. უცნობია, რამდენი ადამიანი დააკავეს თითოეულ რესპუბლიკაში, კონკრეტულად სად ჩატარდა ჩხრეკა ან უკავშირდებოდნენ თუ არა სავარაუდო მონაწილეები ერთმანეთს. FSB-ს ასევე არ განუმარტავს, საიდან მიიღეს ეჭვმიტანილებმა იარაღი ან ვისზე ყიდდნენ მას.

უსაფრთხოების სამსახურების მიერ გავრცელებულ ვიდეოებში დაკავებისა და ჩხრეკის შედეგად აღმოჩენილი იარაღის კადრებია ნაჩვენები. ზოგიერთ ვიდეოში ჩანს დაკავებისას ძალის გამოყენება — პოლიციელები ადამიანებს მანქანებიდან უხეშად გადმოათრევენ, უყვირიან და მათკენ იარაღს მიმართავენ.

FSB-ის განცხადებით, ამოღებული იარაღი ექსპერტიზაზე გადაიგზავნა. ექსპერტიზის შედეგების მიხედვით, შესაძლოა, სისხლის სამართლის საქმეები აღიძრას იარაღისა და საბრძოლო მასალის უკანონო ბრუნვასთან დაკავშირებული მუხლებით.

იარაღის უკანონო ბრუნვაში ეჭვმიტანილების წინააღმდეგ FSB მსგავს მასშტაბურ ოპერაციებს პერიოდულად ატარებს. მაგალითად, 2024 წლის აგვისტოში უწყებამ განაცხადა, რომ რუსეთის 51 რეგიონში 288 ადამიანის საქმიანობა აღკვეთა. მათ შორის იყო დაღესტანი, ინგუშეთი, ჩეჩნეთი და ჩრდილოეთი ოსეთი. მაშინ, უწყების ინფორმაციით, ამოღებული იყო 586 ერთეული ცეცხლსასროლი იარაღი, მათ შორის ყუმბარმტყორცნები და ცეცხლმტყორცნები, 467 კილოგრამზე მეტი ასაფეთქებელი ნივთიერება და 153 ათასი საბრძოლო ვაზნა.