პარტია გახარია საქართველოსთვის დეპუტატი გიგა ფარულავა აცხადებს, რომ თუ ტექნიკური ხარვეზი იყო, მაშინ შეკრება-მანიფესტაციების კანონში ცვლილებებზე მათ მიერ დაინიცირებული კანონპროექტი ხელახლა უნდა ჩატარდეს. ფარულავა ქართული ოცნებისა და ხალხის ძალის იმ 16 დეპუტატის მიერ კანონპროექტისთვის მხარდაჭერის დაფიქსირებას გამოეხმაურა.

ფარულავას განცხადებით, თუ უმრავლესობის წარმომადგენლები ამტკიცებენ, რომ მათი წევრების მხრიდან კანონპროექტის მხარდაჭერა ტექნიკური ხარვეზი იყო, მაშინ კენჭისყრა თავიდან უნდა გაიმართოს, რათა საზოგადოებამ დეპუტატების რეალური პოზიცია იხილოს.

"ჩვენ დავაინიცირეთ კანონი "შეკრებებისა და მანიფესტაციების შესახებ" და თანმდევ სამართლებრივ ნორმებში, ადმინისტრაციულ სამართალდარღვევათა კოდექსში, ასევე სისხლის სამართლის კოდექსში, რეპრესიული ნორმების გაუქმებასთან დაკავშირებით.

როგორც მოგეხსენებათ, კენჭისყრის შედეგად უმრავლესობის 16-მა დეპუტატმა მხარი დაუჭირა ამ კანონპროექტს, მათ შორის უმრავლესობის ლიდერმა. ისინი დღეს აცხადებენ, რომ ეს შედეგები დაფიქსირდა ტექნიკური ხარვეზით.

თუ ეს ტექნიკური ხარვეზია, მაშინ მოვითხოვთ ხელახლა ჩატარდეს კენჭისყრა, ვინაიდან, როგორც ისინი ასახელებენ მიზეზს — ტექნიკურ ხარვეზს, ესე იგი ეს არ ასახავს დეპუტატების რეალურ ნებას.

მოვითხოვთ მოხდეს ხელახალი კენჭისყრა ამ კონკრეტულ კანონთან დაკავშირებით, რომ თითოეულ დეპუტატს ჰქონდეს დააფიქსიროს საკუთარი პოზიცია და კიდევ ერთხელ საზოგადოებამ ნათლად ნახოს, ვინ უჭერს მხარს დარჩეს რეპრესიული სამართლებრივი ნორმები ძალაში, რომელიც ჩვენს მოქალაქეებს უზღუდავს გამოხატვის თავისუფლებას. შესაბამისად, მოვუწოდებთ ოცნებას ხელახალი კენჭისყრისკენ", — განაცხადა ფარულავამ (IPN).

შეგახსენებთ, 15 სექტემბერს, მმართველმა გუნდმა მხარი არ დაუჭირა პარტია გახარია საქართველოსთვის ინიციატივას, რომელიც 2024 წლამდე არსებული შეკრება-მანიფესტაციის წესების აღდგენას გულისხმობდა. "შეკრება-მანიფესტაციების შესახებ" და მიმდინარე კანონმდებლობაში შესატან ცვლილებებს პარლამენტში 28-მა დეპუტატმა დაუჭირა მხარი, თუმცა ხმების სიმცირის გამო პაკეტი ჩავარდა.

აღნიშნული ინიციატივას საპარლამენტო უმრავლესობიდან პარტია ქართული ოცნების 16-მა დეპუტატმა დაუჭირა მხარი.

მათ შორის არიან: თეა წულუკიანი, ირაკლი კირცხალია, გურამ მაჭარაშვილი, ვახტანგ თურნავა, ანტონ ობოლაშვილი, თორნიკე ბერეკაშვილი, ისკო დასენი, ზაალ დუგლაძე, სამველ მანუკიანი, ნიკოლოზ სამხარაძე, ალუდა ღუდუშაური, გოდერძი ჩანქსელიანი, ვასილ ჩიგოგიძე, გივი ჭიჭინაძე, გიორგი ჭყონია, ეკა სეფაშვილი.

ქართული ოცნების წევრები აღნიშნულს მექანიკურ შეცდომას ან ტექნიკურ პრობლემას უკავშირებენ.

ირაკლი ზარქუას განმარტებით, დეპუტატები კანონპროექტის მხარდაჭერისას, სავარაუდოდ, ტელეფონზე საუბრობდნენ და "ინერციით დააჭირეს".