ევროპარლამენტმა მხარი დაუჭირა გადაწყვეტილებას, რომელიც წარწერით "წარმოებულია სომხეთში" (Made in Armenia) ბლოკში შეტანილ პროდუქციაზე სავაჭრო შეზღუდვების შემსუბუქებას ითვალისწინებს. კერძოდ, გადაწყვეტილების თანახმად, სომხეთიდან ევროკავშირში იმპორტირებულ ფართო სპექტრის საქონელს საბაჟო გადასახადები დროებით ეხსნება.

პარალელურად, საბაჟო გადასახადისგან თავისუფალი იმპორტის კვოტები დაწესდება სომხური სოფლის მეურნეობის რვა ძირითად პროდუქტზე, მათ შორის: ყურძენზე, გარგარზე, ალუბალზე, ატამსა და კიტრზე.

ბრიუსელში "არმენპრესის" კორესპონდენტის ცნობით, ევროკომისიის წინადადებას მხარი 583-მა ევროპარლამენტარმა დაუჭირა, წინააღმდეგი 49 იყო, ხოლო 39-მა თავი შეიკავა.

დოკუმენტი ასევე ითვალისწინებს სპეციალურ დამცავ მექანიზმებს. ეს ნიშნავს, რომ თუ სომხეთიდან იმპორტის მკვეთრი ზრდა ევროპელ მწარმოებლებს პრობლემებს შეუქმნის, ევროკავშირს სიტუაციაში ჩარევის ბერკეტი ექნება.

აღნიშნული ნაბიჯი რუსეთის მიერ დაწესებულ შეზღუდვებს უკავშირდება. 2026 წლის მაისიდან მოსკოვმა სომხური ექსპორტის რამდენიმე მთავარ პროდუქტზე, მათ შორის ალკოჰოლურ სასმელებზე, მინერალურ წყალზე, ხილსა და ბოსტნეულზე, ასევე მათ ტრანზიტზე აკრძალვები დააწესა. ევროკომისიის შეფასებით, ამან სომხეთის ტრადიციული მიწოდების ჯაჭვები დააზარალა და ექსპორტიორებს ბაზრებზე წვდომა შეუზღუდა, რაც განსაკუთრებით მცირე და საშუალო ბიზნესსა და ფერმერებზე აისახა.

ევროკავშირი ამ ნაბიჯს განიხილავს, როგორც დროებით დახმარებას, რომელიც სომხეთის ეკონომიკასა და ადგილობრივ მწარმოებლებს ევროპულ ბაზარზე შესვლას გაუადვილებს.

მომდევნო ეტაპზე ინიციატივას ევროკავშირის საბჭომ ოფიციალურად უნდა დაუჭიროს მხარი. რეგულაცია ძალაში ევროკავშირის ოფიციალურ ჟურნალში გამოქვეყნებისთანავე შევა.