თურქეთის პოლიციამ ლგბტქ+ აქტივისტებისა და სივრცეების წინააღმდეგ მთავრობის მიერ წამოწყებული ბოლო რეპრესიების ფარგლებში ათეულობით ადამიანი დააკავა. ინფორმაციას BBC ავრცელებს.

დემონსტრანტები სამშაბათს, 15 სექტემბერს სტამბოლის მთავარი სასამართლოს შენობასთან შეიკრიბნენ. ისინი ლგბტქ+ აქტივისტების სხვა ჯგუფების გათავისუფლებას ითხოვდნენ, რომლებიც უქმეებზე, ლგბტ-ბარებსა და აქტივისტების სახლებში ჩატარებული რეიდების დროს დააკავეს.

თურქეთის მთავრობამ ლგბტქ+ თემის წევრები და აქტივისტები კამპანიის ფარგლებში დააკავა, რომელსაც "ჩემი ოჯახი დაცულია" ეწოდება. მთავრობის მტკიცებით, აღნიშნული კამპანია ოჯახური ფასეულობების დასაცავადაა შექმნილი.

საინფორმაციო სააგენტო AFP-ის ცნობით, სამშაბათის აქციაზე ხალხი სკანდირებდა: "გაუმარჯოს თავისუფლებისთვის მებრძოლებს!" და დაპატიმრებული აქტივისტების გათავისუფლებას ითხოვდა. პოლიციამ რამდენიმე ადამიანი მას შემდეგ დააკავა, რაც დემონსტრანტებმა ბანერი გაშალეს წარწერით: "ლგბტ ყოფნა დანაშაული არ არის".

პრეზიდენტმა რეჯეფ თაიფ ერდოღანმა კი ლგბტქ+ ადამიანები "გადაგვარებულებად" მოიხსენია და აღნიშნა, რომ ისინი შობადობის შემცირებაზე არიან პასუხისმგებლები.

არასამთავრობო ორგანიზაცია Human Rights Watch-ის ინფორმაციით, მთავრობამ ასევე შეზღუდა ათობით ლგბტ, მედია და უფლებადამცველი ორგანიზაციის სოციალური ქსელის ანგარიშები თუ ვებსაიტები.

ევროპის საბჭოს ადამიანის უფლებათა კომისარმა, მაიკლ ო'ფლაერტიმ, დაკავებებთან დაკავშირებით შეშფოთება გამოთქვა.

"შეშფოთებული ვარ თურქეთის მასშტაბით ლგბტქ+ სამოქალაქო საზოგადოებისა და ადამიანის უფლებათა დამცველების წინააღმდეგ მიმართული დაკავებების, რეიდებისა და ვებგვერდებისა თუ სოციალური ქსელების ანგარიშების დაბლოკვის შესახებ გავრცელებული ცნობებით", — განაცხადა მან.

ო'ფლაჰერტის განცხადებაში აღნიშნულია, რომ თურქეთის იუსტიციის მინისტრის თქმით, ოპერაცია 162 პირის, 9 ასოციაციისა და 13 ბიზნესის წინააღმდეგ 15 პროვინციაში, რამდენიმე მთავარი პროკურორის ოფისის კოორდინაციით მიმდინარეობს.