ევროპარლამენტში ყოველწლიური სიტყვით გამოსვლისას, ევროკომისიის პრეზიდენტმა, ურსულა ფონ დერ ლაიენმა ახალი გლობალური ინიციატივა დააანონსა, რომელიც სამხრეთ კავკასიასა და ცენტრალურ აზიას ევროპულ ბაზართან პირდაპირ დააკავშირებს.

"ამ გარდამტეხი ცვლილებების ეპოქაში, ჩვენი კეთილდღეობა და უსაფრთხოება მხოლოდ ქვეყნის შიგნით ვერ აშენდება.

წელს ჩვენ თავისუფალი ვაჭრობის შეთანხმებები გავაფორმეთ ინდოეთთან, მექსიკასთან, ავსტრალიასა და ინდონეზიასთან.

ახლა სავაჭრო შეთანხმებები გვაქვს 80-ზე მეტ ქვეყანასთან — უფრო მეტთან, ვიდრე მსოფლიოში ნებისმიერს. ბიზნესი კი ჩვენგან კიდევ უფრო მეტს ითხოვს.

დღეს შემიძლია დავაანონსო საერთაშორისო დაკავშირებადობის ახალი პროექტი. ის სამხრეთ კავკასიასა და ცენტრალურ აზიას პირდაპირ დააკავშირებს ევროპულ ბაზართან — იმასთან, რასაც ჩვენ "შუა დერეფანს" ვუწოდებთ.

"გლობალური კარიბჭის" (Global Gateway) მეშვეობით, ჩვენი მიზანია 12 მილიარდ ევრომდე საჯარო და კერძო ინვესტიციის მობილიზება. ჩვენი ამოცანაა მარშრუტების დივერსიფიკაცია, სავაჭრო ნაკადების გასამმაგება და სატვირთო გადაზიდვების ტრანზიტის დროის მკვეთრი შემცირება 2030 წლისთვის.

ამის რეალობად ქცევისთვის, ბულგარეთის პრემიერ-მინისტრთან ერთად, რეგიონული დაკავშირებადობის სამიტს ორგანიზებას გავუწევთ", — განაცხადა ფონ დერ ლაიენმა.

შეგახსენებთ, ტრანსკასპიური საერთაშორისო სატრანსპორტო გზა (TITR), იგივე შუა დერეფანი საერთაშორისო სატრანსპორტო დერეფანია, რომელიც ჩინეთში იწყება, გაივლის ყაზახეთს, კასპიის ზღვით გადადის აზერბაიჯანში, გაივლის საქართველოს და თურქეთისა და შავი ზღვის საშუალებით უკავშირდება ევროპის ქვეყნებს. Global Gateway კი, ევროკავშირის მასშტაბური პროექტია, რომელიც მიზნად მსოფლიოს მასშტაბით მდგრადი და საიმედო ინფრასტრუქტურული კავშირების განვითარებას ისახავს.