პარლამენტმა რეგიონული განვითარების და ინფრასტრუქტურის სამინისტროები გაერთიანებას მხარი დაუჭირა — კანონპროექტს 83-ი დეპუტატის მხარდაჭერა ჰქონდა.

აღსანიშნავია, რომ რეგიონული განვითარებისა და ინფრასტრუქტურის სამინისტრო ორ ნაწილად დაახლოებით წელიწადნახევრის წინ დაიყო.

რა გზა გაიარა რეგიონული განვითარების და ინფრასტრუქტურის სამინისტროებმა 1,5 წელიწადში?

  • 2025 წლის 2 აპრილი — რეგიონული განვითარების და ინფრასტრუქტურის სამინისტროები ერთმანეთს გამოეყო. რეგიონული განვითარების მინისტრად გრიგოლ ლილუაშვილი, ინფრასტრუქტურის მინისტრად კი რევაზ სოხაძე წარადგინეს;
  • 2025 წლის 4 აპრილი — ლილუაშვილი პოლიტიკას ტოვებს და რეგიონული განვითარების მინისტრად კახაბერ გულედანი დაინიშნა;
  • 2026 წლის 30 ივლისი — რეგიონული განვითარების სამინისტროს გაუქმება და რეგიონული პოლიტიკის საკითხებში სახელმწიფო მინისტრის თანამდებობის შემოღება დაანონსდა, რომელიც მამუკა მდინარაძეს უნდა დაეკავებინა; მანამდე კი რეგიონული განვითარების მინისტრის პოსტზე დაინიშნა;
  • 2026 წლის 27 აგვისტო — მამუკა მდინარაძე პოლიტიკიდან წავიდა;
  • 2026 წლის 16 სექტემბერი — პარლამენტმა რეგიონული განვითარების და ინფრასტრუქტურის სამინისტროების კვლავ გაერთიანებას დაუჭირა მხარი.

რეგიონული განვითარების სამინისტრო ინფრასტრუქტურის სამინისტროს 2025 წლის 2 აპრილს გამოეყო. ირაკლი კობახიძემ რეგიონული განვითარების სამინისტროს ხელმძღვანელად სუს-ის ყოფილი უფროსი და ამჟამად ბრალდებული გრიგოლ ლილუაშვილი წარადგინა. თუმცა, ორ დღეში ცნობილი გახდა, რომ გრიგოლ ლილუაშვილი აღნიშნულ პოსტს აღარ დაიკავებდა. ლილუაშვილის ნაცვლად, რეგიონული განვითარების სამინისტროს ხელმძღვანელად კახაბერ გულედანი დაინიშნა.

კახაბერ გულედანი რეგიონული განვითარების სამინისტროს ხელმძღვანელის პოსტს 30 ივლისამდე იკავებდა. 30 ივლისს ცნობილი გახდა, რომ მთავრობის სტრუქტურაში ახალი — რეგიონული პოლიტიკის საკითხებში სახელმწიფო მინისტრის თანამდებობა იქმნებოდა და ამ პოსტზე მამუკა მდინარაძე დაინიშნებოდა. მდინარაძე იმ დროისთვის სამართალდამცავი ორგანოების კოორდინაციის საკითხებში სახელმწიფო მინისტრის პოზიციას იკავებდა. ირაკლი კობახიძემ მაშინ განმარტა, რომ ამ საკადრო ცვლილებების ფონზე საქართველოს რეგიონული განვითარების სამინისტრო დანიშნულებას კარგავდა და ის სექტემბერში გაუქმდებოდა. რეგიონული განვითარების მოქმედი მინისტრი კახა გულედანი კი საქართველოს ინფრასტრუქტურის მინისტრის პირველი მოადგილის თანამდებობაზე გადავიდა.

BMG-ის ინფორმაციით, 2026 წელს რეგიონული განვითარების სამინისტროს ბიუჯეტი 132.9 მილიონი ლარით განისაზღვრება. ინფრასტრუქტურის სამინისტროს კი 3.1 მილიარდი ლარით.