ევროკომისიის პრეზიდენტმა ურსულა ფონ დერ ლაიენმა განაცხადა, რომ ევროკავშირი კანადისთვის კარებს აღებს, რათა ის ბლოკის პირველი "ასოცირებული წევრი" გახდეს — ეს არის პოზიცია, რომლის შექმნაც გაერთიანებას ნულიდან მოუწევს. ინფორმაციას Deutsche Welle ავრცელებს.

ფონ დერ ლაიენის ეს განცხადება ევროპარლამენტში, სტრასბურგში წლიური სიტყვით გამოსვლისას გაჟღერდა, რა დროსაც დარბაზში კანადის პრემიერმინისტრი მარკ კარნი იმყოფებოდა.

ეს მას შემდეგ მოხდა, რაც რამდენიმე დღის წინ გამოცემა Wall Street Journal-მა გაავრცელა ინფორმაცია, რომ კარნი ბლოკთან "ასოცირებული წევრობის" შესაძლებლობას იკვლევდა — ეს არის სტატუსი, რომელიც ამჟამად ფორმალურად ევროკავშირში არ არსებობს.

კარნიმ ამ ამბავს კვირის დასაწყისშივე უპასუხა და განაცხადა, რომ ის ბლოკთან არა წევრობას, არამედ "უნიკალურ ალიანსს" ეძებს.

"პარტნიორობა ევროპისთვის სტრატეგიული არჩევანია. მაგრამ ის ასევე არის პასუხი საერთაშორისო წესებზე დამყარებული სისტემის ბზარებზე. ჩვენ სამყაროს ერთნაირი თვალებით ვუყურებთ: ხელოვნური ინტელექტიდან კლიმატის ცვლილებამდე, არქტიკიდან გეოპოლიტიკამდე. ჩვენ ერთად ვიდექით: უკრაინის საკითხში, თავდაცვაში, ნედლეულის მარაგისა და მიწოდების ჯაჭვების მიმართულებით. მაგრამ, უპირველეს ყოვლისა... ევროპას და კანადას დემოკრატიის სჯერათ", — განაცხადა ურსულა ფონ დერ ლაიენმა ევროკავშირის მდგომარეობის შესახებ თავის ყოველწლიურ მიმართვაში.

DW წერს, რომ ევროკავშირი და კანადა, რომლებიც კონფლიქტებისა და სავაჭრო ომების ფონზე ისედაც ძლიერ დაუახლოვდნენ ერთმანეთს, ცდილობენ, პარტნიორობა დაამყარონ, რათა ეკონომიკურად დივერსიფიცირდნენ და თავი აარიდონ ჩინეთსა და შეერთებულ შტატებზე ზედმეტ დამოკიდებულებას.