"თბილისი პრაიდი და სხვები საქართველოს წინააღმდეგ" — ადამიანის უფლებათა ევროპულმა სასამართლომ 5-6 ივლისის ძალადობრივ მოვლენებზე თბილისი პრაიდის საქმე დაარეგისტრირა. ის ეხება ძალადობრივი ჯგუფების მიერ ღირსების მარშის ორგანიზატორებისა და ლგბტ აქტივისტების წინააღმდეგ მიმართულ ფართომასშტაბიან და ორგანიზებულ ძალადობას.

სტრასბურგის სასამართლოში თბილისი პრაიდის ინტერესებს საქართველოს დემოკრატიული ინიციატივა იცავს.

"მომჩივნები სტრასბურგის სასამართლოს სთხოვენ დაადგინოს ადამიანის უფლებათა ევროპული კონვენციის მე-14 მუხლის დარღვევა მე-3 და მე-11 მუხლებთან კავშირში, რაც გულისხმობს დისკრიმინაციული მოტივით ღირსების შემლახველ მოპყრობასა და შეკრების თავისუფლების ხელყოფას.

მომჩივნები განსაკუთრებულ ყურადღებას ამახვილებენ 5 ივლისს მომხდარი ძალადობის პრევენციის მიზნით სახელმწიფოს უმოქმედობაზე, ძალადობის ორგანიზატორების დაუსჯელობაზე, ჩადენილი დანაშაულების არაეფექტურ გამოძიებასა და პროკურატურის მიერ მსხვერპლების დაზარალებულად არ ცნობაზე", — წერს თბილისი პრაიდი.

მათი განცხადებით, მნიშვნელოვანია, რომ სტრასბურგის სასამართლოს გადაწყვეტილებით აღდგეს მომჩივნების დარღვეული უფლებები და სახელმწიფოს დაეკისროს შესაბამისი პასუხისმგებლობა მისი უმოქმედობისათვის.

5 ივლისს ეკლესიისა და ჰომოფობიური ჯგუფების მიერ მობილიზებულმა მოძალადეებმა ხელი შეუშალეს ღირსების მარშის გამართვას, დაარბიეს თბილისი პრაიდისა და სირცხვილიას ოფისები და აქტივისტებს სხვა ოფისებშიც სდიეს, სადაც უსაფრთხო ადგილის მოძებნას ცდილობდნენ.

5 ივლისს ძალადობრივი ჯგუფების თავდასხმის შედეგად 53 ჟურნალისტი დაშავდა. მათგან ერთი TV პირველის ოპერატორი, ლექსო ლაშქარავა 11 ივნისს გარდაიცვალა. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები.