ქართული ოცნების თავმჯდომარე, ირაკლი კობახიძე ამბობს, რომ საქართველოდან უკრაინის ელჩის გაწვევა ქართული სახელმწიფოს შეურაცხყოფაა. მისივე თქმით, ეს უკრაინის ხელისუფლების მხრიდან ალოგიკური ნაბიჯი იყო.

"მაქსიმუმს ვაკეთებდით იმისათვის, რომ პოლიტიკური მხარდაჭერა გაგვეწია, რა თქმა უნდა, უკრაინისთვის. შესაბამისად, კიდევ უფრო ალოგიკურია ის ნაბიჯები, რაც ჩვენ დავინახეთ უკრაინის ხელისუფლების მხრიდან. ჩვენ გვესმის, რომ უკრაინის ხელისუფლება არის მძიმე მდგომარეობაში, ომის მდგომარეობაში, თუმცა ეს არ ამართლებს იმ ნაბიჯებს, რომელიც არის შეურაცხყოფა ქართული სახელმწიფოსთვის. ეს არის ერთადერთი შეფასება, რომელიც ჩვენ შეგვიძლია გავაკეთოთ", — განაცხადა მან საზოგადოებრივი მაუწყებლის ეთერში.

კობახიძის თქმით, ელჩის თანამდებობიდან გათავისუფლება წინა პროცესების, ელჩის კონსულტაციებზე გაწვევის გაგრძელება და ერთგვარი დემარშის კიდევ ერთი ფორმაა.

გუშინ ვიდეომიმართვაში უკრაინის პრეზიდენტმა განაცხადა, რომ ხელი მოაწერა ბრძანებას საქართველოსა და მაროკოდან ელჩების გაწვევის შესახებ. მანამდე, ერთი თვის წინ მან იგორ დოლგოვი კონსულტაციებისთვის გაიწვია.