ქართული ოცნების თავმჯდომარემ, ირაკლი კობახიძემ საგანგებო ბრიფინგი გამართა და კვლავ ნაციონალურ მოძრაობაზე ისაუბრა. ამჯერად მან რამდენიმე მოვლენა დაასახელა, რომლის უკანაც ოპონენტების როლი დაინახა.

მისი თქმით, სწორედ ენმ-ს ვიზიტის შემდეგ, დაიწყო უკრაინამ საუბარი "ომის საქართველოში გადმოტანაზე". კობახიძის შეფასებით, "ამის მკაფიო მაგალითი" იყო უკრაინის უშიშროების საბჭოს მდივნის, ალექსეი დანილოვის განცხადება.

მოკლედ გიამბობთ იმ მოვლენებზე რომლის უკანაც კობახიძე ოპოზიციური პარტიის როლს ხედავს.

"ენმ-ს მიერ მოწყობილი ყველა პროვოკაციის უმთავრესი მიზანი საქართველოს ომში ჩართვაა"

ქართული ოცნების თავმჯდომარე ფიქრობს, რომ ენმ პროვოკაციებს აწყობს, რისი მთავარი მიზეზიც საქართველოს ომში ჩართვაა. კობახიძემ "პროვოკაციების" ნაწილიც ჩამოთვალა, რომელთა შორისაა:

  • "მუდმივი მოწოდებები ეკონომიკური სანქციების დაწესებაზე";
  • "ამავე მიზანს ემსახურებოდა უმძიმესი პროვოკაციული მცდელობა, საქართველოს მთავრობის ნებართვით უკრაინაში გამგზავრებულიყო მოხალისე მებრძოლებით სავსე თვითმფრინავი";
  • "დისკრიმინაციული პროპაგანდა რუსი ეროვნების მოქალაქეების წინააღმდეგ";
  • "მოწოდებები ხელისუფლების მიმართ იარაღის შეძენისკენ";
  • "სამხედრო სტატუსის შესახებ თემის სპეკულაციური წამოწევა";
  • "მოწოდებები ხელისუფლების მიერ უხეში რიტორიკის გამოყენებისკენ".

"საქართველოდან უკრაინის ელჩის გაწვევა იყო ენმ-ს მიერ ორგანიზებული პოლიტიკური ზეწოლის აქტი"

ქართული ოცნების თავმჯდომარე ირაკლი კობახიძე ამტკიცებს, რომ საქართველოდან უკრაინის ელჩის გაწვევა იყო "ომის პარტიის", ნაციონალური მოძრაობის მიერ ორგანიზებული პოლიტიკური ზეწოლის აქტი, რომელიც საზოგადოებაში მღელვარების გამოწვევასა და საქართველოს ხელისუფლების პოლიტიკის ცვლილებას ისახავდა მიზნად.

კობახიძე თანაგუნდელებს აქებს და ამბობს, რომ ხელისუფლებამ ყველა "პროვოკაციას" "სათანადოდ" უპასუხა და სიტუაციის ესკალაცია არ დაუშვა.

"ხაზგასმით გვინდა განვაცხადოთ, რომ საქართველოს ხელისუფლება რჩება მშვიდობიანი დეოკუპაციის პოლიტიკის ერთგული და წინ აღუდგება ყველა პროვოკაციას, რომელიც ჩვენს აფხაზ და ოს ძმებთან და დებთან ახალი სამხედრო დაპირისპირების ესკალაციას ისახავს მიზნად", — თქვა მან.

"კონკრეტული ინფორმაცია გვაქვს, რომ ენმ იდგა საწვავის გაძვირებაზე აქციების უკან"

უკვე შეჩვეული ვართ, რომ ქართული ოცნება ყველა პროტესტს ნაციონალურ მოძრაობას უკავშირებს, თუმცა ამჯერად საზოგადოების ნაწილი მაინც გააოცეს, როდესაც საწვავის ფასებზე გაძვირების გამო გამართული აქციის უკანაც თავიანთი ოპონენტები დაინახეს.

კობახიძის მტკიცებით ამ კავშირის დამადასტურებელი კონკრეტული ინფორმაციაც აქვთ. მან განმარტა, რომ ეს არის პრობლემა და გამოწვევა, რაზეც მუშაობს საქართველოს ხელისუფლება. პარტიის თავმჯდომარემ აღნიშნა, რომ ეს პრობლემა ყველა ქვეყანაში დგას.

"ეს არის არა შეფასება, არამედ, ფაქტის კონსტატაცია. რაც თქვა პრემიერმა ეს არის ფაქტის კონსტატაცია და არა შეფასება. ჩვენ გვაქვს ინფორმაცია, იმასთან დაკავშირებით, როგორ იყო ორგანიზებული. ეს აქციები სისტემურად იყო ორგანიზებული არამარტო თბილისში, სხვა ქალაქებშიც. კონკრეტული ინფორმაცია გვაქვს იმაზე, რომ ნაციონალური მოძრაობა იდგა ამ აქციების უკან", — თქვა მან.

თბილისში აქციაზე, სადაც მოქალაქეები საწვავის ფასებს აპროტესტებდნენ, 20 ადამიანი დააკავეს.