პარლამენტთან აქციაზე დროას ლიდერმა, ელენე ხოშტარიამ აქციაზე 3 მოთხოვნა წამოაყენა, ესენია — მთავრობის გადადგობა, რუსეთისთვის ცის ჩაკეტვა და ევროკავშირის წევრობაზე განაცხადის გაკეთება.

"ამიტომ, ყველა საზოგადოებრივი ჯგუფი, პარტია შევთანხმდით, რომ უნდა ჩამოვაყალიბოთ კონკრეტული მოთხოვნები, რომლის მიღწევასაც ყველა ერთად მოვითხოვთ და აუცილებლად მივაღწევთ.

პირველი — წავიდეს და თან წაიყოლოს მთავრობა ირაკლი ღარიბაშვილმა, ქართული ოცნება ჩვენ არ წარმოგვადგენს, ამიტომ უპირველესი მოთხოვნა არის მისი წასვლა და ის სირცხვილი, რომელიც მან მოსცხო საქართველოს, ჩვენს ისტორიასა და ჩვენს მომავალს, ჩვენი ჩამოსარეცხია. ის აუცილებლად უნდა წავიდეს. ის აუცილებლად აღარ უნდა წარმოადგენდეს ჩვენს ღირსეულ ხალხს.

ამის შემდეგ ჩვენ უნდა გადავიდეთ ქმედით და კონკრეტულ ნაბიჯებზე, რომ დავეხმაროთ უკრაინას და რეალურად ვიყოთ მათი სოლიდარულები. დავუხუროთ ცა რუსეთს, გავუხსნათ ცა უკრაინას.

მესამე — დღეს უკრაინამ საკუთარი მსხვეპლით, რომელიც 5 ღამეა ყველას გვატირებს, გახსნა შესაძლებლობები, რომ ჩვენც ყველა ერთად გავხდეთ თავისუფალი ევროპის ნაწილი, ეს შესაძლებლობა, რომელიც გვესიზმრებოდა და ესიზმრებოდათ ჩვენს წინაპრებს, დღეს დევს მაგიდაზე და ეს უგურები ამბობენ, რომ არ გვინდა, ამიტომ მესამე მოთხოვნაა ამათი წასვლისთანავე საქართველომ ევროკავშირის წევრობაზე შეიტანოს განაცხადი", — განაცხადა ხოშტარიამ აქციაზე.

უკრაინის პრეზიდენტმა, ვოლოდიმირ ზელენსკიმ საქართველოდან უკრაინის ელჩი გაიწვია. უცნობია ის კონსულტაციებისთვის გაწვევას გულისხმობს თუ არა. ზელენსკი ამბობს, რომ მიზეზი სანქციებზე "ამორალური პოზიცია" და უკრაინაში მოხალისეების წასვლაში ხელის შეშლაა.

საქართველოში უკრაინის საქმეთა დროებითმა რწმუნებულმა, ანდრეი კასინოვმა საელჩოში გამართულ ბრიფინგზე თქვა, რომ იმედი აქვთ, საქართველოსგან ჰუმანიტარულ დახმარებას კიდევ მიიღებენ. მანვე აღნიშნა, რომ უკრაინის პრეზიდენტმა, ვოლოდიმირ ზელენსკიმ ელჩი კონსულტაციებზე გაიწვია.

ქართული ოცნების თავმჯდომარის, ირაკლი კობახიძის თქმით, უკრაინაში მოხალისეების გაგზავნა სამხედრო კონფლიქტში ჩართვაა და ამას ვერ გააკეთებენ.