ნაციონალური მოძრაობის წევრის, ანატოლი გიგაურის განაჩენის გამოცხადება გადაიდო. როგორც მოსამართლემ განმარტა, განაჩენის გამოცხადების თარიღი მოგვიანებით გახდება ცნობილი.

ამ გადაწყვეტილებამდე, ანატოლი გიგაურმა დარბაზში მსხდომებს მიმართა.

"პირველი, რასაც აკეთებთ, ნებისმიერ გადაწყვეტილებას ხვდებით ტაშით, არავითარი ცრემლები, ბოროტებას არ მისცეთ საშუალება, რომ გაიმარჯვოს", — განაცხადა ანატოლი გიგაურმა.

ადვოკატის თქმით კი, სახეზე იყო წინააღმდეგობის გარემოება, ანატოლი გიგაური იმყოფებოდა აუცილებელი მოგერიების რეჟიმში. აღნიშნულ პოზიციას ბრალდების მხარე არ იზიარებდა.

ცნობისთვის, ანატოლი გიგაური სამართალდამცავებმა 25 ნოემბერს დააკავეს. გამოძიების ინფორმაციით, ბრალდებული, ადგილზე საზოგადოებრივი წესრიგის დაცვისთვის მყოფ პატრულ-ინსპექტორს თავს დაესხა და მასზე ფიზიკურად იძალადა. ანატოლი გიგაურს ბრალი სისხლის სამართლის კოდექსის 353-ე პრიმა მუხლით ჰქონდა წარდგენილი, რაც პოლიციელზე თავდასხმას გულისხმობს.

დანაშაული 4-დან 7 წლამდე ვადით თავისუფლების აღკვეთას ითვალისწინებს.

პროკურატურამ პოლიციელზე თავდასხმისთვის დაკავებულ ანატოლი გიგაურს ბრალი წარუდგინა