რუსეთის ინტერესთა სექცია შვეიცარიის საელჩოში საქართველოში სოციალურ ქსელში განცხადებას ავრცელებს, სადაც აღნიშნულია, რომ მათ თბილისში მიმდინარე ფარიკაობის მსოფლიო ჩემპიონატზე რუსოფობიური ქმედებები შენიშნეს. განცხადებაში ასევე ნათქვამია, რომ ისინი საქართველოს კომპეტენტური ორგანოებიდან აუცილებელი ზომებს მიღებას მოელიან, რათა სამართლიანი, დისკრიმინაციისგან და პოლიტიზებისგან თავისუფალი შეჯიბრების პირობები იყოს უზრუნველყოფილი.

"ჩვენ კიდევ ერთი რუსოფობიური ქმედება შევნიშნეთ, რომელიც პოლიტიკურად აქტიური პირების კარგად ცნობილმა ჯგუფმა თბილისში მიმდინარე ფარიკაობის მსოფლიო ჩემპიონატზე (ნეიტრალური სტატუსით) მონაწილე ჩვენი სპორტსმენების წინააღმდეგ ჩაიდინა.

პროვოკაციული ქმედებების აშკარა მიზანია ანტირუსული თემის გამოყენება რადიკალური ძალების მხარდამჭერების მობილიზებისთვის და თბილისისთვის, როგორც მასპინძელი მხარისთვის, პრესტიჟის შელახვისთვის.

ჩემპიონატის შესაბამის დონეზე ჩატარებისთვის, ორგანიზატორთა ძალისხმევის გათვალისწინებით ველით, რომ საქართველოს კომპეტენტური ორგანოები მიიღებენ აუცილებელ ზომებს მიიღებენ, რათა უზრუნველყოფილ იქნეს სამართლიანი, დისკრიმინაციისგან და პოლიტიზებისგან თავისუფალი შეჯიბრების პირობები", — წერია გავრცელებულ განცხადებაში.

ცნობისთვის, საქართველო ფარიკაობის მსოფლიო ჩემპიონატს მასპინძლობს, სადაც რუსი სამხედრო სპორტსმენებიც იღებენ მონაწილეობას

25 სპორტსმენიდან 17-ს სამხედრო წოდება აქვს, რომელსაც რუსული პროპაგანდა საკუთარი მიზნებისა და უკრაინაში დაწყებული ომის გასამართლებლად იყენებს.

სპორტსმენთა რიგებში არიან რუსეთის შეიარაღებული ძალების მაიორები, ლეიტენანტები და რუსი ომის "გმირები".

რუსი სამხედრო სპორტსმენების ჩემპიონატში მონაწილეობა გუშინ მოქალაქეებმა გააპროტესტეს — საპროტესტო ბანერები გაშალეს და რუსეთის დროშა დაწვეს.