ამერიკის შეერთებული შტატების პრეზიდენტი დონალდ ტრამპი აპირებს, რომ რუსეთისთვის მეორადი სანქციების დაწესების 50-დღიანი ვადა შეამციროს. ამის შესახებ მან შოტლანდიაში, დიდი ბრიტანეთის პრემიერმინისტრთან კირ სტარმერთან შეხვედრისას, ჟურნალისტებს განუცხადა.

ტრამპმა კიდევ ერთხელ აღნიშნა, რომ იმედგაცრუებულია ვლადიმერ პუტინით და რუსეთის მიერ უკრაინის მისამართით რაკეტების გაშვებით.

"ბევრი ვესაუბრე პრეზიდენტ პუტინს, მას ძალიან კარგად ვუგებდი — თუმცა ის იწყებს რაკეტების გაშვებას, მაგალითად კიევში და ბევრ ადამიანს კლავს მოხუცებულთა თავშესაფარში და სხვა ადგილებში... ყველგან გვამებია. ძალიან იმედგაცრუებული ვარ პუტინით. მე ვაპირებ 50 დღე შევამცირო, რადგან ვფიქრობ, რომ უკვე ვიცი, რა მოხდება," — განაცხადა ტრამპმა.

ამასთან, შეერთებული შტატების პრეზიდენტმა კირ სტარმერთან შეხვედრის დაწყებამდე ისაუბრა ტაილანდსა და კამბოჯას შორის ცეცხლის შეწყვეტის შესახებაც და ამ შეთანხმების გამო კმაყოფილება გამოხატა.

"ეს ძალიან ცუდი ომი იქნებოდა და შეიძლებოდა წლების განმავლობაში გაგრძელებულიყო. მილიონობით ადამიანი შეიძლებოდა დაღუპულიყო. ჩვენ დავასრულეთ ომი და ამით ძალიან ბედნიერები ვართ," — აღნიშნა ტრამპმა.

მან ისაუბრა საკუთარ როლზეც მსოფლიოს სხვადასხვა ნაწილში არსებულ, თუ მისი თქმით, მოსალოდნელ სამხედრო დაპირისპირებებშიც.

"მე რომ არა, ახლა მსოფლიოში ექვსი დიდი ომი იქნებოდა" — აღნიშნავს აშშ-ის პრეზიდენტი.

"ინდოეთსა და პაკისტანს შორის ბრძოლა იქნებოდა. ნახეთ, გუშინ რისი გაკეთება მოვახერხეთ ორ ქვეყანასთან, რომელთანაც ვვაჭრობთ. ბევრი ცხელი წერტილია, მაგრამ ვფიქრობ, მთავარი ინდოეთი და პაკისტანი იყო, რადგან ეს ორი ბირთვული ქვეყნებია," — განაცხადა ტრამპმა.

ასევე იხილეთ: