ჩინეთი, რომელსაც პოლიტიკური და ეკონომიკური კავშირები აქვს როგორც კამბოჯასთან, ასევე ტაილანდთან, მიესალმება ძალისხმევას, რომელიც სამხრეთ-აღმოსავლეთ აზიის ამ ორ მეზობელს შორის საბრძოლო მოქმედებების დასრულებას ისახავს მიზნად. ამის შესახებ ინფორმაციას BBC ავრცელებს.

პეკინის საგარეო საქმეთა სამინისტროს განცხადებით, ჩინეთი მხარეებს კონფლიქტის "რაც შეიძლება მალე" დასრულებისკენ მოუწოდებს და აღნიშნავს:

"ვიმედოვნებთ, რომ ორივე მხარე თავისი ხალხის საერთო ინტერესებიდან გამომდინარე იმოქმედებს, გააგრძელებს მშვიდობის მნიშვნელობის დაფასებას და კეთილმეზობლური ურთიერთობების განვითარების სულისკვეთებას, იმოქმედებს გონივრულად და თავშეკავებულად."

ცნობისთვის, ორი ქვეყნის 817 კმ-იანი საზღვრის გარკვეულ მონაკვეთებზე დავა საუკუნეზე მეტია გრძელდება. აქამდე სხვადასხვა წლებში შეტაკებები და მსხვერპლიც დაფიქსირდა, მათ შორის 2011 წლის ერთკვირიანი არტილერიით მოქმედებების დროს.

ახლა დაძაბულობა მაისში დაიწყო, როცა კამბოჯელი ჯარისკაცი მოკლეს.

ამჯერად ბრძოლა კამათის საგნად ქცეული ტა მოან თომის ტაძრის მახლობლად დაიწყო, ბანგკოკიდან დაახლოებით 360 კმ-ში.