ეროვნული ბანკი სტატისტიკიდან ირკვევა, თუ რა თანხები ინახება ქართულ ბანკებში, სხვადასხვა ვალუტაში — ამავე მონაცემებზე ინფორმაციას ბიზნესპრესნიუსი" ავრცელებს და წერს, რომ ბანკებში განთავსებულ ანაბრებზე ყველაზე დიდი წილი აშშ დოლარზე მოდის.

ივნისის მდგომარეობით ქართულ ბანკებში დოლარში 23.829 მლრდ ლარის დეპოზიტები ინახება, ევროში კი 5.846 მლრდ ლარის მოცულობის. მთლიანად კი საბანკო სექტორში განთავსებული დეპოზიტების (ბანკთაშორისი დეპოზიტების გარდა) მოცულობამ 2025 წლის ივნისის ბოლოსათვის 60.77 მილიარდი ლარი შეადგინა, რაც 1.85 მილიარდი ლარით, 3.15%-ით მეტია წინა თვის ბოლოს არსებულ მაჩვენებელზე (გაცვლითი კურსის ეფექტის გარეშე 3%-ით მეტი). ეროვნული ბანკის ცნობით, დეპოზიტების წლიურმა ზრდამ გაცვლითი კურსის ეფექტის გარეშე 11.57% შეადგინა.

რაც შეეხება ოკუპანტ ქვეყანას და რუბლს, bpn-ის ცნობით და ეროვნული ბანკის სტატისტიკის თანახმად, ქართულ კომერციულ ბანკებში 2.026 მილიარდზე მეტი რუსული რუბლი ინახება. უფრო კონკრეტულად, 2025 წლის ივნისი მდგომარეობით, რუბლში განთავსებული დეპოზიტების მოცულობა 69.022 მილიონ ლარს შეადგენდა. (დღევანდელი კურსით 2.026 მლრდ რუბლი).

ცნობისთვის, რუბლის დეპოზიტები წინა წლის ანალოგიურ პერიოდთან შედარებით 7%-ით არის გაზრდილი, ეროვნული ბანკის სტატისტიკის მიხედვით, გასული წლის ივნისის მდგომარეობით ბანკებში 64.447 მილიონი ლარის მოცულობის რუბლის ანაბრები ინახებოდა.

რაც შეეხება სხვა მეზობელი ქვეყნების ვალუტებს, გამოცემის ცნობით, მონაცემები ასე გამოიყურება:

  • თურქული ლირა — 1 329 104 ლარი (დღევანდელი კურსით 19.9 მლნ ლირა)
  • აზერბაიჯანული მანათი — 87 939 ლარი (დღევანდელი კურსით 55.2 ათასი მანათი)
  • სომხური დრამი — 104 995 ლარი (დღევანდელი კურსით 14.87 მლნ დრამი)