თბილისის მერიის ინფორმაციით, გუშინ, 17 თებერვალს გვიან ღამით, მეტროსადგურ ვარკეთილის მიმდებარე ტერიტორიიდან გარემოვაჭრეების დახლები აიღეს. დღეს დილით კი ადგილზე მისულ მოქალაქეებს დახლების გაშლის უფლება აღარ მიეცათ.

მერიის განმარტებით, გარევაჭრობის აღკვეთის მოთხოვნით, მუნიციპალიტეტის მერიას, თბილისის მუნიციპალურ ინსპექციასა და რაიონულ გამგეობას მოქალაქეებმა არაერთხელ მიმართეს. ამბობენ იმასაც, რომ მეტროსადგურ ვარკეთილის მიმდებარედ გარევაჭრობა უკანონოდ ხორციელდებოდა და ტროტუარის დაკავების შედეგად, გადაადგილება ფერხდებოდა.

"სამგორის გამგეობის წარმომადგენლების მუშაობის შედეგად, ბაზრობის დირექცია გარემოვაჭრეებს სპეციალურ პირობებს შესთავაზებს. კერძოდ, ისინი სამი თვის განმავლობაში, გათავისუფლდებიან საიჯარო გადასახადისგან, ხოლო შემდგომში საშეღავათო პირობებით ისარგებლებენ. სამგორის რაიონის გამგეობის ორგანიზებით, გარემოვაჭრეებსა და შპს ვარკეთილი 96-ის წარმომადგენლებს შორის შეხვედრებიც გაიმართა. მუნიციპალურმა ინსპექციამ კი მოვაჭრეები რამდენჯერმე გააფრთხილა, უნებართვო სამეწარმეო საქმიანობა შეეწყვიტათ", — ვკითხულობთ მერიის განცხადებაში.

დღეს დილით, 18 თებერვალს მეტროსადგურთან მისულმა მოქალაქეებმა დახლების გაშლა ვეღარ შეძლეს და როგორც ისინი ფორმულასთან ამბობენ, მათი შემოსავლის ერთადერთი წყარო ვაჭრობაა და მისი აკრძალვის შემთხვევაში, შემოსავლის გარეშე რჩებიან. ერთ-ერთი გარემოვაჭრის თქმით, განუმარტეს, რომ "ხედს ამახინჯებენ".

"გარე გამწვანება უნდა გააკეთონ, რომ ქალაქი იყოს ლამაზი. რომელ სილამაზეზეა ლაპარაკი, როცა ადამიანს პურის ფული არ აქვს?" — ამბობს ერთ-ერთი გარემოვაჭრე.

26 იანვარს კახა კალაძემ თქვა, რომ ვარკეთილის მეტროს მიმდებარე ტერიტორიის კეთილმოწყობას გეგმავს და გარემოვაჭრეებს სხვაგან გადასასვლელად "გონივრულ ვადას" აძლევს. კალაძის განცხადებით, ამ გადაწყვეტილების მიზეზი გახდა "ბევრი უკმაყოფილო ადამიანის ზარი", რომლებისთვისაც მეტროს მიმდებარედ გადაადგილება არაკომფორტულია.