ესტონეთის ყოფილი პრეზიდენტი, ტომას ჰენდრიკ ილვესის განცხადებით, რომ სცოდნოდათ რუსეთის პრეზიდენტი, ვლადიმერ პუტინი ქვეყნის ლიდერი 2022 წლამდე იქნებოდა, ქართველებსა და უკრაინელებს, NATO-ში გაწევრიანებაზე თანხმობას, ალბათ, მაშინ ეტყოდნენ.

"2008 წელს პუტინი ხელისუფლებაში 8 წლის განმავლობაში იყო. ჩვენ რომ გვცოდნოდა, ის კრემლში 2022 წლამდე და 2030 წლამდეც დარჩებოდა, იქნებ ქართველებისა და უკრაინელებისთვის მაშინ გვეთქვა, რომ მივიღებდით", — განაცხადა მან DW-სთან ინტერვიუში.

კითხვაზე როგორ გამოიყურებიან უკრაინა და საქართველო დღეს, ის პასუხობს, რომ საქართველო ამ პარამეტრებით NATO-ში გაწევრიანებას რთულად შეძლებდა.

"წევრობის სამოქმედო გეგმა მხოლოდ შეიარაღებული ძალების ტრანსფორმაციის პროცესი არ არის. ეს ასევე ეხება ქვეყანაში დემოკრატიის მდგომარეობას. ამ პარამეტრის მიხედვით, საქართველო NATO-ში გაწევრიანებას რთულად თუ შეძლებდა. ბოლო წლებში, კანონის უზენაესობასთან დაკავშირებით, სიტუაცია იქ საგრძნობლად გაუარესდა", — აღნიშნა მან.

მისივე თქმით, საქართველოს ხელმძღვანელობას გაუჭირდება NATO-ს წევრებს დაუმტკიცოს, რომ საქართველო მათ ღირებულებებს იზიარებს. ილვესის განცხადებით, ცივი ომის დროს დემოკრატიის დეფიციტის მქონე ქვეყანას შეეძლო ალიანსში გაწევრიანება, მაგრამ დღეს — არა.