რუსეთის პრეზიდენტმა, ვლადიმერ პუტინმა უკრაინის ყოფილ პრეზიდენტს, პეტრო პოროშენკოს დასცინა და რუსეთში პოლიტიკური თავშესაფარი "შესთავაზა". ამის შესახებ მან საფრანგეთის პრეზიდენტთან შეხვედრის შემდეგ გამართულ ბრიფინგზე განაცხადა.

პუტინმა ტრადიციულად რუსული პროპაგანდა გაავრცელა და თქვა, რომ უკრაინაში ადამიანის უფლებები ირღვევა, რის მაგალითად უკრაინის ექსპრეზიდენტის საქმე მოიყვანა და პოროშენკოს შეახსენა, რომ რუსეთი თავშესაფარს სთავაზობდა. ამის შემდეგ კი ირონიულად დასძინა, რომ შეთავაზება ძალაშია.

"პრეზიდენტის ყურადღება გავამახვილე უკრაინაში ადამიანის უფლებების დარღვევის მასობრივ შემთხვევებზე — იხურება არასასურველი მედია, დევნიან პოლიტიკურ ოპონენტებს. აქვე აღვნიშნავ, რომ თავის დროზე, როცა ბატონი პოროშენკო ჯერ კიდევ უკრაინის პრეზიდენტი იყო, ვუთხარი, რომ თუ სამომავლოდ შეექმნება პრობლემები, რუსეთი მზად არის, მისცეს პოლიტიკური თავშესაფარი. მაშინ ის ირონიულად უდგებოდა ამ საკითხს, მაგრამ დღეს მინდა დავაზუსტო ეს შეთავაზება, მიუხედავად იმისა, რომ გვაქვს სერიოზული უთანხმოება დონბასში სიტუაციის რეგულირებაზე და მგონია, რომ მან ამ მხრივ დაუშვა ბევრი შეცდომა, თუმცა მისი დევნა, ჩემი აზრით, დღევანდელი ხელისუფლების წარმატებისთვის გადაჭარბებული მცდელობაა", — თქვა მან.

პეტრო პოროშენკო უკრაინაში 17 იანვარს ჩავიდა. კიევის სასამართლოს გადაწყვეტილებით, ის არ დააკავეს. სასამართლომ ექსპერზიდენტი პირადი პასუხისმგებლობით გაათავისუფლა და საზღვარგარეთ გასამგზავრებელი პასპორტის ჩაბარება დაავალა.

2021 წლის 17 დეკემბერს გამოძიების სახელმწიფო ბიუროში განაცხადეს, რომ პოროშენკომ უგულებელყო გამომძიებლები, რომლებიც ცდილობდნენ მის გამოძახებას დანაშაულებრივი სქემის საქმეზე. იმავე დღეს ცნობილი გახდა, რომ ყოფილი პრეზიდენტი ქვეყნიდან გაემგზავრა. 20 დეკემბერს, იმის გამო, რომ შეტყობინება პირადად ვერ მიაწოდეს, ის გაგზავნეს საცხოვრებელ, ასევე, რეგისტრაციის მისამართზე და სამუშაო ადგილას. 6 იანვარს პოროშენკოს ქონება დააყადაღეს.

უკრაინის ყოფილი პრეზიდენტი ქვეყნის ოკუპირებული ტერიტორიებიდან ნახშირის მიწოდების დანაშაულებრივი სქემის საქმეშია ბრალდებული. მას ტერორიზმის დაფინანსებაში, ტერორისტული ორგანიზაციის შექმნაში და სახელმწიფო ღალატში ადანაშაულებენ. კონკრეტულად მას ბრალი ედება იმაში, რომ წინასწარი შეთანხმებით, გარკვეულ პირებთან, მათ შორის რუსეთის მაღალჩინოსნების წარმომადგენლებთან ერთად ხელი შეუწყო "ლუგანსკის სახალხო რესპუბლიკისა და დონეცკის სახალხო რესპუბლიკის საქმიანობას". ორივე თვითგამოცხადებული რესპუბლიკაა, რომელიც ოკუპირებულია რუსეთის მიერ.