ამერიკის შეერთებული შტატების ელჩის საქართველოში, კელი დეგნანის განცხადებით, ბევრი კარგი რამის გაკეთებაა შესაძლებელი, თუ ხალხი ერთმანეთის მოსმენას ისწავლის. ასე დეგნანი ქვეყანაში არსებულ პოლარიზაციაზე დასმულ შეკითხვას პასუხობს. მისი თქმით, ამ მხრივ, პრეზიდენტ სალომე ზურაბიშვილის ინიციატივა დასაფასებელია.

"ერთმანეთს მეტად უნდა მოვუსმინოთ და ნაკლებად დავესხათ თავს, იქნება ეს საქართველოში, თუ შეერთებულ შტატებში [...] ვფიქრობ ბევრი კარგი საქმის გაკეთება არის შესაძლებელი, ხალხმა ერთმანეთის მოსმენა რომ დაიწყოს. ამ მხრივ, პრეზიდენტ ზურაბიშვილის ძალისხმევას ვაფასებ, რომ დაიწყოს საუბარი პოლარიზაციის ფესვებზე, ზოგიერთი განსხვავების შეჯერებაზე და მოშუშების პროცესის დაწყებაზე, იმედი მაქვს, პრეზიდენტი წარმატებული იქნება", — თქვა მან ამერიკის ხმასთან ინტერვიუში.

ელჩი NDI-ის მიერ ჩატარებულ კვლევებსაც შეეხო და აღნიშნა, რომ პოლიტიკურმა ლიდერებმა გამოვლენილი შედეგები სერიოზულად უნდა მიიღონ და ისეთ თემებზე იმუშაონ, რაც ხალხს აწუხებს.

"ჩემთვის ძალიან საინტერესო იყო ის, რომ იმავე NDI-ის გამოკითხვაში, ადამიანების 80%-ს სურს, რომ მისმა პარტიამ პარლამენტში ყველა პოლიტიკურ პარტიასთან ითანამშრომლოს საჭირბოროტო საკითხებზე. სამწუხაროდ, უმრავლესობას არ მიაჩნია, რომ რომელიმე პარტია მუშაობს თემებზე, რომელიც მათ აწუხებთ, ან მათ ინტერესებში შედის, პოლიტიკურმა ლიდერებმა ეს სერიზულად უნდა მიიღონ. ამომრჩევლებს სურთ, მათ ისეთ თემებზე იმუშაონ, როგორიცაა უმუშევრობა, ჯანდაცვა, სამუშაო ადგილების შექმნა, განათლების სისტემის გაუმჯობესება", — აცხადებს ის.