Novaya Gazeta-ს ჟურნალისტი, ელენა მილაშინა რუსეთს ტოვებს. ამის შესახებ ინფორმაციას გამოცემის რედაქცია ავრცელებს და ამბობს, რომ ქვეყნიდან მისი წასვლის გადაწყვეტილება ჩეჩნეთის წარმომადგენლების მხრიდან განხორციელებული არაერთი მუქარის გათვალისწინებით მიიღეს.

"შექმნილი ვითარების გამო, რომელიც ფედერაციის მთავრობასა და ჩეჩნეთის რესპუბლიკის ხელმძღვანელს, რამზან კადიროვს შორის ჩამოყალიბდა, ასევე, ბოლო დღეებში ჩეჩნეთის რესპუბლიკის სახელისუფლო რგოლების მაღალი წარმომადგენლების მხრიდან განხორციელებული მრავალრიცხოვანი პირადი მუქარის გათვალისწინებით, რედაქტორებმა მიიღეს გადაწყვეტილება, რომ ელენა მილაშინა რუსეთის ფედერაციის ფარგლებს გარეთ გაუშვან", — ვკითხულობთ განცხადებაში.

მათი თქმით, ჟურნალისტი უსაფრთხოების პროტოკოლის შესაბამისად მოქმედებს, თუმცა მისი მდებარეობის ცვლილება ჩეჩნეთის ადამიანის უფლებების საკითხის გაშუქებას არ შეეხება.

მილაშინა ცნობილი რუსი გამომძიებელი ჟურნალისტი და უფლებადამცველია, რომელიც ჩეჩნეთის საკითხებს აშუქებს. Amnesty International-ის ცნობით, ჩეჩნეთში ადამიანის უფლებების დარღვევის გამოვლენის გამო, ის არაერთხელ გამხდარა მუქარის სამიზნე.