თეთრი სახლის პრესმდივანმა, ჯენ ფსაკიმ რუსეთის პრეზიდენტის, ვლადიმერ პუტინის უკრაინისადმი ქმედებები მელას შეადარა და განაცხადა, რომ როცა ის ქანდარიდან ქათმების შიშზე ყვირის, ეს ფაქტი არ არის. მისი თქმით, აშშ დიპლომატიისთვის კარს ღიას ტოვებს, თუმცა ეს არ ნიშნავს იმას, რომ მათი ღირსებულებების ერთგულნი არ იქნებიან.

"არ ვიცით, პრეზიდენტი პუტინი რას გააკეთებს. თუმცა ძალიან მნიშვნელოვანია და ჩვენი პასუხისმგებლობაა, რომ დიპლომატიისთვის კარი ღია დავტოვოთ. ეს არ ნიშნავს, რომ ჩვენ ჩვენი ღირებულებების გვერდით არ ვიდგებით, რაც გულისხმობს NATO-სა და მისი წევრების რწმენას, რომ ალიანსის წევრებმა გადაწყვიტონ, ვინ შეიძლება გაწევრიანდეს და ამის კარი ღია უნდა დარჩეს. ამიტომ, თუ ეს არის მათი ერთ-ერთი პრეტენზია, ჩვენ პირადადაც გავიმეორეთ ის, რაც საჯაროდ გვითქვამს.

სახელმწიფო მდივანს, ენტონი ბლინკენს ეს ანალოგიები წარსულშიც გამოუყენებია — როცა მელა ქანდარიდან ყვირის, რომ ქათმების ეშინია, რასაც ისინი არსებითად აკეთებენ, ეს შიში არ არის ფაქტი. როგორც უყურებთ, როცა პრეზიდენტი პუტინი ყვირის უკრაინისა და უკრაინელების შიშზე, ეს ფაქტად არ უნდა იყოს მოხსენიებული. ჩვენ ვიცით, ამ შემთხვევაში მელა ვინ არის, ვნახეთ საზღვრებზე სამხედროების ზრდა, მათ შორის, მათი გადაადგილება ბელარუსში და ჩვენი როლია, რომ ვიმუშავოთ სხვა ქვეყნებთან ერთად, რომ დიპლომატიის კარი ღია დავტოვოთ", — თქვა მან ბრიფინგზე.

უკრაინის საზღვრებთან სიტუაცია უფრო და უფრო იძაბება. 26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. ამის ფონზე რუსეთი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება. ბოლო ინფორმაციით, რუსეთს უკრაინის საზღვრებთან 100 ათასამდე სამხედრო ჰყავს მობილიზებული.

გაიგე მეტი: