ეკონომიკის მინისტრის, ნათია თურნავას განცხადებით, ნებისმიერ შემთხვევაში სტრატეგიული ენერგეტიკული პროექტები უნდა განვითარდეს.

"ნებისმიერ შემთხვევაში სტრატეგიული ენერგეტიკული პროექტები უნდა განვითარდეს და ჩვენ გვაჩვენა ამ ნამახვანის პერიპეტიებმა ის, რომ ასეთ სტრატეგიულ პროექტებში, რა თქმა უნდა, უფრო მეტ ნდობას იწვევს ის ფაქტი, თუკი სახელმწიფო არის ლიდერი.

სახელმწიფო მზად არის ლიდერობისთვის ამ ტიპის პროექტებში. ეს ისეთი ტიპის პროექტებია, სტრატეგიული პროექტები, რომელზეც რესურსი ყოველთვის მოინახება იმიტომ, რომ ჩვენი ენერგეტიკული უსაფრთხოება და მომავალი, ეკონომიკური ზრდაც არის დამოკიდებული", — განაცხადა მან საზოგადოებრივი მაუწყებლის ეთერში.

მისივე თქმით, ისინი ეცდებიან, რომ კომპანია ენკასთან ურთიერთობა დავის გარეშე მოაგვარონ ურთიერთმისაღები პირობებით.

"მიუხედავად იმისა, თუ როგორ წარიმართება ჩვენი შემდგომი ურთიერთობები კომპანია ენკასთან ან ნებისმიერ კონკრეტულ ინვესტორთან, მიუხედავად იმისა, თუ შეასრულებს ეს ინვესტორი ვალდებულებებს, თუ ვერ შეასრულებს, შეძლებს თუ არა სწორი კომუნიკაციის აწყობას პროექტის ირგვლივ, თვითონ პროექტი არ უნდა დაზიანდეს. ჩვენ მზად ვართ, რომ გავყოთ ეს ორი საკითხი და ასეც უნდა მივუდგეთ. ინვესტორთან, რა თქმა უნდა, ჩვენ შევეცდებით, რომ არბიტრაჟის გარეშე და დავის გარეშე, რომელიც ჯერ არ დაწყებულა და წინასაარბიტრაჟო მოლაპარაკებები მიმდინარეობს, დავხუროთ ეს ფურცელი, თუ დავინახავთ, რომ ინვესტორი მზადაა, უფრო მეტად მოქნილი გახდეს, კომუნიკაციაში შევიდეს მოსახლეობასთან, იგივე გარემოს დაცვით საკითხებს სწორად უპასუხოს და ამის სურვილი გააჩნია, დაბრუნდეს, ამაზეც ვისაუბრებთ.

თუ მოლაპარაკების შედეგად ისე აღმოჩნდა, რომ ჩვენ გვირჩევნია და ინვესტორსაც ურჩევნია ერთმანეთს დავცილდეთ, ესეც გვინდა დავის გარეშე მოხდეს, ურთიერთმისაღები პირობებით", — თქვა მინისტრმა.

22 სექტემბერს ცნობილი გახდა, რომ ნამახვანჰესის ინვესტორმა, ენკამ საქართველოს მთავრობასთან ხელშეკრულების გაწყვეტის გადაწყვეტილება მიიღო და მიზეზად კონტრაქტის პირობების დარღვევა დაასახელა.

ექსპერტების შეფასებით, თუ კომპანიასა და მთავრობას შორის საარბიტრაჟო დავა დაიწყება, ქვეყანას ასეულობით მილიონი დოლარის გადახდა მოუწევს.

ინვესტორის მხრიდან ხელშეკრულების გაწყვეტას წინ ჰესის მშენებლობის მოწინააღმდეგეთა პროტესტი უძღოდა. თავდაპირველად აქციები რიონის ხეობაში იმართებოდა, შემდეგ კი თბილისშიც. საბოლოოდ, მხარეებს შორის მედიაციის პროცესში ევროკავშირის ენერგეტიკული გაერთიანების წარმომადგენელი ჩაერთო, თუმცა ნამახვანჰესის მშენებლობის მოწინააღმდეგეებმა მედიაციის პროცესი დატოვეს.