ნამახვენჰესის მშენებლობის მოწინააღმდეგეებმა 3-თვიანი დახურული მოლაპარაკებების შემდეგ ხელისუფლებასთან მედიაციის პროცესს ტოვებენ. აქტივისტების განცხადებით, საპროტესტო მოძრაობის საინიციატივო ჯგუფმა ამ პროცესში წითელ ხაზს მიაღწია.

"რაც შეეხება შესაძლო მედიაციის არსებით ნაწილს, ამ მხრივაც იყო მსჯელობა, კერძოდ, განისაზღვრა და შეთანხმდა ხელშეკრულებისა და გზშ დოკუმენტების შეფასების კრიტერიუმები და პროცედურა. სამინისტროების მხრიდან გარკვეული წინააღმდეგობის მიუხედავად, ეს არის, ჯერჯერობით, ერთადერთი შეთანხმებული და ორივე მხარისთვის მისაღები საკითხი. [...]

სექტემბრის დასაწყისში მედიატორი შვებულებიდან დაბრუნდა, მიმოწერა აღდგა და ონლაინ შეხვედრაც შედგა, მაგრამ ჩვენ, პროტესტის ჯგუფს, ამ კომუნიკაციაში მონაწილეობა აღარ მიგვიღია. არც სახელისუფლებო ჯგუფს და არც მედიატორს ჩვენი არყოფნა არ შეუნიშნავს, როგორც ჩანს, ჩვენი ჩართულობის აუცილებლობა ვერ დაინახეს", — წერია განცხადებაში.

განცხადებაში, ასევე, წერია, რომ პრემედიაციის პროცესი მნიშვნელოვანი ხარვეზებით წარიმართა. მიღწეული წითელი ხაზის გადაკვეთა კი, მათი აზრით, პროტესტს შეუქცევადად დააზიანებს. პრემედიაციაში ჩართული პოტესტის ჯგუფი მიიჩნევთ, რომ არა მხოლოდ წინაპირობების შეუსრულებლობა, არამედ მთლიანობაში მიკერძოებულად, უსამართლოდ და გაუმჭვირვალედ წარმარმართული პროცესი რიონის ხეობის მოძრაობის შემდგომ მონაწილეობას მასში შეუძლებელს ხდის.

"ვწუხვართ, რომ ჩვენი და სახელისუფლებო ჯგუფის ურთიერთობის კიდევ ერთი ეტაპი დასრულდა. მართალია, ძალიან მოულოდნელი არაფერი მომხდარა, მაგრამ ჩვენ დიდი სურვილი გვქონდა, პროცესი ახალი, პოზიტიური მიმართულებით განვითარებულიყო. იქნება თუ არა შესაძლებელი პროექტის დამოუკიდებელი და მაღალკვალიფიციური შეფასება, ამას დრო გვიჩვენებს. რიონის ხეობაში კი უკანონო მშენებლობისა და ანტისახელმწიფოებრივი პროექტის წინააღმდეგ პროტესტი გრძელდება", — ნათქვამია განცხადებაში.

ნამახვან ჰესის მშენებლობას ადგილობრივი მოსახლეობის ნაწილი აპროტესტებს. ხშირად ისინი გზას კეტავენ, კარვებს შლიან და მძიმე ტექნიკას ხელს უშლიან მუშაობაში.