რუსეთის მხრიდან პირველი შეფასება საჯაროდ საკანონმდებლო ორგანოს საერთაშორისო საქმეთა კომიტეტის წევრმა, იგორ მოროზოვმა გაავრცელა. მან ფაქტი რუსეთის სახელმწიფო საინფორმაციო სააგენტო რია ნოვოსტისთან ინტერვიუში შეაფასა.

"აშშ–ს მიერ ავიაბაზაზე შეტევა გვაგონებს იუგოსლავიის დაბომბვას, სამხედრო ინტერვენციას ერაყში, ლიბიის დანგრევას და საერთაშორისო სამართლის უპატივცემულობის სხვა აქტებს", – თქვა იგორ მოროზოვმა. მისივე თქმით, "ახლა ცხადი გახდა, რომ იდლიბის პროვინციაში ქიმიური იარაღის გამოყენება ამერიკული პროვოკაცია იყო, რათა იერიში მიეტანათ ავიაბაზაზე."

სირიაში მიმდინარე სამოქალაქო ომის დაწყებიდან ექვსი წლის შემდეგ, 2017 წლის 7 აპრილს, ამერიკის შეერთებული შტატების ხელისუფლებამ პირველი პირდაპირი იერიში მიიტანა სირიის სამთავრობო ძალების პოზიციებზე. როგორც პრეზიდენტმა ტრამპმა განაცხადა, ამის მიზეზი გახდა სირიის ხელისუფლების მიერ რამდენიმე დღის წინ საკუთარი მოქალაქეების მიმართ, აჯანყებულთა კონტროლირებად ტერიტორიაზე, ქიმიური იარაღის გამოყენება. იდლიბის პროვინციაში, 4 აპრილს, ავიაიერიშებს, რა დროსაც, სავარაუდოდ გამოიყენეს ქიმიური ბომბები, მომწამვლელ გაზს ათეულობით ადამიანი ემსხვერპლა, მათ შორის არიან ბავშვები.

სირიის საჰაერო ბაზის მიმართულებით, ამერიკული ავიამზიდიდან, ტომაჰავკის ტიპის 59 რაკეტა ისროლეს. აშშ–ს ხელისუფლების განმარტებით, ავიაიერიშის მთავარი მიზანი აღნიშნული სამხედრო ბაზის ინფრასტრუქტურის იმგვარი მოშლა იყო, რომ მისი გამოყენება ვერ მოახერხონ. გარდა ამისა, პენტაგონის თქმით, ავიადარტყმები ღამით განხორციელდა, რათა მსხვერპლი პერსონალს შორის მაქსიმალურად ყოფილიყო აცილებული.

ტრამპის აღიშნული გადაწყვეტილება მნიშვნელოვანია რამდენიმე მიზეზის გამო. პირველი ეხება მის საგარეო კურსს. ის მუდამ აცხადებდა, რომ აშშ არ უნდა ჩაერიოს სამხედრო ძალით სხვა ქვეყნის კონფლიქტებში. მეორე მნიშვნელოვანი ფაქტორი კი რუსეთია.

სწორედ რუსეთის ფედერაცია უმაგრებს ზურგს ასადის რეჟიმს და ეხმარება მას პირდაპირი სამხედრო ძალით აჯანყებულების წინააღმდეგ საბრძოლველად.