განახლება: ევროპარლამენტის მიერ დამტკიცებული ცვლილება ეხება ევროკავშირის წევრ ქვეყნებს. ნიუსის თავდაპირველ ვერსიაში აღნიშნული ცხადად არ იყო მითითებული.

ევროკავშირის წევრ ქვეყნებში მოგზაურობისას, მომხმარებელს ადგილობრივი ტარიფებით სარგებლობა შეეძლება, როგორც სატელეფოონო სერვისებზე - ზარების, შეტყობინებების, ასევე მობილური ინტერნეტის გამოყენებისას. ამის შესახებ, რეგულაცია დღეს, ექვს აპრილს, ევროპარლამენტმა დაამტკიცა, 549 ხმით 27-ის წინააღმდეგ. დღევანდელი კენჭისყრა იყო საბოლოო დაბრკოლება როუმინგის ტარიფების გაუქმების გზაზე.

ევროკომისიის ცნობით, უფასო როუმინგის სპეციალურად გააქტიურება საჭირო არ იქნება და ევროკავშირის ქვეყნებში შესვლისას, კონკრეტული ოპერატორი კომპანიის დაფარვა და მისი ტარიფი ავტომატურად გავრცელდება მიმდინარე წლის 15 ივნისიდან. მანამდე, ოპერატორი კომპანიები საკუთარ მომხმარებლებს დაუკავშირდებიან და პირობებს გააცნობენ.

ასევე, ცვლილების თანახმად, თუკი მომხმარებელს ულიმიტო პაკეტი აქვს შეძენილი საკუთარ ქვეყანაში, მისი გამოყენება შეეძლება ევროკავშირშიც.

ევროკომისიის ვებსაიტზე ვიცე პრეზიდენტ ანდრუს ანსიპის განცხადებაში ვკითხულობთ, რომ ეს არის უდიდესი მიღწევა და იგი იქნება საბოლოო ნაბიჯი, რომ გაუქმდეს როუმინგის გადასახადები ევროკავშირაში მოგზაურთათვის:

"როუმინგის ასეთი დიდი გადასახადი იყო ანომალიური იმ კონტინენტისთვის, სადაც ადამიანები შეუზღუდავან გადაადგილდებიან ქვეყნიდან ქვეყანაში. მათი გაუქმებით კი ჩვენ მივიღებთ ბევრად უფრო ძლიერ ერთიან ციფრულ ბაზარს. როგორც იქნა ადამიანები აღარ გათიშავებ მობილურ ინტერნეტს საზღვარზე გადმოსვლისას და ამას პოზიტიური ზეგავლენა ექნება ევროპელების ცხოვრებაზე".