13 დეკემბერს რუსეთმა განაცხადა, რომ NATO-ს გეგმებისა და იმის გათვალისწინებით, რასაც ხედავს, შესაძლოა, "იძულებული გახდეს" ევროპაში შუალედური დიაპაზონის ბირთვული რაკეტები განათავსოს.

Reuters წერს, რომ საგარეო საქმეთა მინისტრის მოადგილის, სერგეი რიაბკოვის ამ გაფრთხილებამ კონტინენტზე ახალი შეიარაღების დაგროვების რისკი გააჩინა.

რიაბკოვმა თქვა, რომ პოლიტიკური და დიპლომატიური გადაწყვეტისკენ პროგრესის არარსებობა რუსეთს სამხედრო ტექნოლოგიით პასუხის გაცემისკენ უბიძგებს.

Reuters-ის თანახმად, იმ ფონზე, როდესაც რუსეთის პრეზიდენტი ვლადიმერ პუტინი დასავლეთისგან გარანტიებს ითხოვს, ხოლო შეერთებული შტატები და მოკავშირეები მას აფრთხილებენ, უკრაინაში შეჭრის მცდელობსგან თავი შეიკავოს, რიაბკოვი ბოლო დღეებში გამოჩნდა, როგორც მოსკოვის ერთ-ერთი მთავარი გამხმოვანებელი.

NATO აცხადებს, რომ ევროპაში ახალი ამერიკული რაკეტები არ განლაგდება და ის მზადაა შეაკავოს ახალი რუსული რაკეტები "გაზომილი" პასუხით, რომელიც მხოლოდ ჩვეულებრივ იარაღს მოიცავს. მაგრამ რიაბკოვი ამბობს, რომ რუსეთს აქვს "ნდობის სრული ნაკლებობა" ალიანსის მიმართ.

შუალედური დიაპაზონის ბირთვული იარაღი — 500-დან 5 500 კმ-მდე (310-დან 3 400 მილამდე) — აკრძალული იყო ევროპაში 1987 წელს საბჭოთა კავშირის მაშინდელ ლიდერ მიხეილ გორბაჩოვსა და აშშ-ს პრეზიდენტ რონალდ რეიგანს შორის დადებული ხელშეკრულების საფუძველზე, რაც მაშინ მოიწონეს კიდევაც.

ვაშინგტონი პაქტიდან 2019 წელს გამოვიდა მას შემდეგ, რაც წლების განმავლობაში უჩიოდა სავარაუდო დარღვევებს, რუსეთის მიერ სახმელეთო საკრუიზო რაკეტის შემუშავების ირგვლივ, რომელსაც მოსკოვი უწოდებს 9M729-ს და NATO მოიხსენიებს, როგორც Screwdriver.