ჯანდაცვის ჯერ კიდევ მოქმედი მინისტრი, ეკატერინე ტიკარაძე ამტკიცებს, რომ გადაწყვეტილება გადადგომასთან დაკავშირებით თავად მიიღო და ამაზე დიდი ხანი ფიქრობდა. მისი თქმით, დაპირისპირების ძებნის საფუძველი არ არსებობს და როდესაც ადამიანი დიდი ხანი არის ერთ თანამდებობაზე, საჭიროა გარკვეული ცვლილებები დარგის განვითარებისთვის.

"იმის არანაირი საფუძველი არ არის, რომ ვეძებოთ სკანდალი ან რაიმე სახის დაპირისპირება. მსგავსი არ მომხდარა და აქედან გამომდინარე, მედია და საზოგადოება შეიძლება იყოს მშვიდად.

რაც შეეხება გადაწყვეტილების მიღებას, ამასთან დაკავშირებით, მე ვიღებ სრულიად პასუხისმგებლობას იმაზე, რომ ეს იყო ჩემი გადაწყვეტილება, რასთან დაკავშირებითაც მე საკმაოდ დიდი ხანი ვფიქრობდი, ვინაიდან, ზოგადად, ვთვლი, რომ როდესაც ადამიანი სამი წელია არის ერთ ადგილზე, მნიშვნელოვანია ამ დარგის და ადგილის განვითარებისთვის გარკვეული ცვლილებები მოხდეს. თუმცა, გამომდინარე პანდემიიდან ასევე ვგრძნობდი პასუხისმგებლობას, რომ არ შეიძლებოდა გარკვეული საქმეების შუაში მიტოვება, მნიშვნელოვანი იყო მათი დასრულება", — განაცხადა მან იმედის ეთერში.

როგორც ტიკარაძემ განმარტა, ახალი წლიდან ახალი მინისტრი გააგრძელებს ამ პოსტზე მუშაობას, რადგან მნიშვნელოვანი ჰგონია, ახალი წელი დაიწყოს ახალი ხედვით.

"ახალი წლიდან ახალი მინისტრი გააგრძელებს ამ პოსტზე მუშაობას. ვთვლი, რომ მნიშვნელოვანი არის ახალი წელი დაიწყოს ახალი ხედვით და ახალი ბიუჯეტი მართოს იმ ადამიანმა, რომელიც შემდეგ უკვე მართავს, როგორც პანდემიას, ასევე, ჯანდაცვის სამინისტროს ყველა დანარჩენ მიმართულებას და მნიშვნელოვანი არის, რომ მას ჰქონდეს სრული თავისუფლება ამ გადაწყვეტილებებში", — განაცხადა მან.

ტიკარაძე არ ადასტურებს ღარიბაშვილთან დაპირისპირებას. მისი თქმით, არ შეიძლება, პროფესიული საქმიანობისას დაფიქსირებული აზრი "გადათარგმნილი იყოს, როგორც სკანდალი".

"პასუხი არის მხოლოდ ერთი — დაპირისპირება ჩვენს შორის არ ყოფილა. ჩვენ ერთად ისევ ვიქნებით პოლიტსაბჭოში, ასევე, გვექნება თანამშრომლური ურთიერთობა და ამას დაინახავს საზოგადოება მომავალშიც", — განაცხადა მან.

როგორც ტიკარაძე ამბობს, ახალი მინისტრის ვინაობაზე ინფორმაცია არ აქვს, მაგრამ მიაჩნია, რომ პრემიერი "შესაფერის კანდიდატურას წარადგენს". მისი თქმით, მომავალ კოლეგას მხარში დაუდგება.

ჯანდაცვის მინისტრი, ეკატერინე ტიკარაძე თანამდებობიდან 11 დეკემბერს გადადგა. ამის შესახებ მან ქართული ოცნების ოფისში სპეციალურად გამართულ ბრიფინგზე განაცხადა. უფრო ზუსტად, ტიკარაძემ თავისი სამწლიანი მოღვაწეობა შეაფასა, ყველას მადლობა გადაუხადა და განაცხადა, რომ კონსულტაციების შემდეგ სწორად მიიჩნია საქმიანობის პარტიის პოლიტსაბჭოში გაგრძელება. მინისტრს სიტყვა გადადგომა არ უხსენებია, არც ჟურნალისტების კითხვებს უპასუხა, ამიტომ მისი გადადგომის დაზუსტება უწყების პრესამსახურში გახდა საჭირო.

12 დეკემბერს, მისმა მოადგილემ, თამარ გაბუნიამ განაცხადა, რომ ტიკარაძე თანამდებობაზე წლის ბოლომდე იქნება. მანვე აღნიშნა, რომ გადადგომაზე არ იცოდა, თუ ის გადადგომას აპირებდა.

ეკატერინე ტიკარაძისა და პრემიერმინისტრ ირაკლი ღარიბაშვილის შესაძლო დაპირისპირებაზე მედია რამდენიმე დღე აქტიურად საუბრობდა. ამბობდნენ, რომ დაპირისპირება კორონავირუსის მართვაზე განსხვავებულმა ხედვებმა გამოწივია. ამ თემაზე ჯანდაცვის მინისტრს რამდენჯერმე ჰკითხეს, თუმცა ის პასუხს თავს ირიდებდა. გარდა ამისა, მინისტრს ეკითხებოდნენ, იყო თუ არა დაპირისპირების და კამათის მიზეზი მწვანე პასპორტების საკითხი, რაზეც ის ამბობდა, რომ არა დაპირისპირება, არამედ განხილვა ჰქონდათ.

ტიკარაძემ რამდენჯერმე თქვა ისიც, რომ არ ემხრობოდა მთავრობის დაწესებულ უვადო მწვანე პასპორტის იდეას და როგორც ჯანდაცვის სფეროს წარმომადგენელი, ვირუსის მართვის უფრო მკაცრი ზომების მომხრე იყო.