სახალხო დამცველის, ნინო ლომჯარიას განცხადებით, მაღალი თანამდებობის პოლიტიკოსთა მხრიდან არასამთავრობო ორგანიზაციების მადისკრედიტირებელი განცხადებები დღემდე აქტუალურია. ლომჯარიამ 9 დეკემბერს, უფლებადამცველთა საერთაშორისო დღეს, თბილისის ადამიანის უფლებათა სახლის ღონისძიებაზე განაცხადა, რომ მნიშვნელოვანია, მაღალი თანამდებობის პირებმა აღნიშნონ, უფლებადამცველი ორგანიზაციების მნიშვნელობა, მაშინაც კი, როდესაც ისინი ხელისუფლების მიმართ კრიტიკულები არიან.

"ჩვენმა მონიტორინგმა უფლებადამცველთა მიმართ განხორციელებული თავდასხმების არაერთი სამწუხარო ტენდენცია გამოავლინა. მათ შორის, დღემდე აქტუალურია მაღალი პოლიტიკური თანამდებობის პირთა მხრიდან დემოკრატიული განვითარებისთვის უმნიშვნელოვანეს საკითხებზე მომუშავე არასამთავრობო ორგანიზაციების მადისკრედიტირებელი განცხადებები. წარსულში, არაერთი მსგავსი ფაქტი გაგვიკრიტიკებია და კვლავ საგანგებოდ განვმარტავთ, რომ საერთაშორისო სტანდარტების თანახმად, თანამდებობის პირები ვალდებულნი არიან თავი შეიკავონ უფლებადამცველებისა და მათი საქმიანობის წინააღმდეგ მიმართული ნეგატიური კამპანიის წარმოებისგან, საჯაროდ აღიარონ მათი დაცულობის საჭიროება და აღნიშნონ უფლებადამცველთა საქმიანობის მნიშვნელობა მაშინაც კი, როდესაც ის კრიტიკულია ხელისუფლების მიმართ", — თქვა ლომჯარიამ.

სახალხო დამცველმა განსაკუთრებით საგანგაშო უწოდა 5 ივლისს, ღირსების მარშის დღეს, ძალადობრივი ჯგუფების ფიზიკურ თავდასხმებს უფლებადამცველებზე და ორგანიზაცია თბილისი პრაიდისა და მოძრაობა სირცხვილიას ოფისებზე, რომელიც სამართალდამცავებმა ვერ აღკვეთეს.

9 დეკემბერს უფლებადამცველთა საერთაშორისო დღე, ამ დღესთან დაკავშირებით ადამიანის უფლებათა სახლმა ღონისძიება გამართა, სადაც ლომჯარიამ ამ თემაზე ისაუბრა.

ომბუდსმენმა დღეს ასევე თქვა, რომ თვალშისაცემია საჯარო უწყებების მიდგომები და განცხადებები მედიის მისამართით, ამიტომ ნინო ლომჯარიას თქმით, ამ საკითხს შეისწავლიან.

ასვე, სახალხო დამცველმა რეკომენდაციით მიმართა საქართველოს პროკურატურას და შინაგან საქმეთა სამინისტროს — დროულად უზრუნველყონ მედიის წარმომადგენელთა წინააღმდეგ ჩადენილი დანაშაულების გამოძიება, პასუხისმგებელ პირთა გამოვლენა და მათ მიმართ კანონით გათვალისწინებული ღონისძიებების გატარება. პოლიტიკური თანამდებობის პირებს კი მოუწოდა — უფლებადამცველების, მათ შორის, ჟურნალისტების საქმიანობის მაქსიმალურად ხელშესაწყობად, იხელმძღვანელონ საერთაშორისოდ აღიარებული დემოკრატიული სტანდარტებით და თავი შეიკავონ მათი დისკრედიტაციის კამპანიაში ჩართვისგან.