იუსტიციის მინისტრის მოადგილის, ბექა ძამაშვილის მტკიცებით, სტრასბურგის სასამართლოს წერილი, სადაც აღნიშნულია, რომ ექსპრეზიდენტი, მიხეილ სააკაშვილი ადეკვატურ სამედიცინო დაწესებულებაში უნდა გადაიყვანონ, იუსტიციის მინისტრის ბრიფინგიდან 6 საათის შემდეგაა ატვირთული. ძამაშვილი ირწმუნება, რომ წერილის გამოქვეყნების დროს სახელმწიფოს მიერ არამარტო ევროპული სასამართლოს მიერ მითითებული ღონისძიებები, არამედ "გაცილებით მეტი" იყო გაკეთებული.

"სტრასბურგის სასამართლოს წერილი, რომელზეც დღეს მიუთითებენ, ატვირთულია 19 ნოემბერს, 20 საათსა და 52 წუთზე, თბილისის დროით. 6 საათის შემდეგ, რაც უკვე იუსტიციის სამინისტროს ეს ღონისძიებები განხორციელებული აქვს. ფაქტობრივად, ამ წერილის ატვირთვიდან 6 საათით ადრე, უკვე სრულად შესრულებულია, არათუ ის ღონისძიებები, რომელსაც ევროპული სასამართლო მიუთითებდა, არამედ გაცილებით მეტია გაკეთებული, ვინაიდან, როგორც უკვე აღინიშნა, უზრუნველყოფილი იქნა ამ ჰუმანური გადაწყვეტილებით არამხოლოდ მსჯავრდებულის ჯანმრთელობის და სიცოცხლის დაცვა, არამედ ბევრი სხვა ადამიანის ჯანმრთელობის დაცვა", — ამბობს ის.

ძამაშვილი ამბობს, რომ იუსტიციის მინისტრის, რატი ბრეგაძის მიერ 19 ნოემბერს გამართული ბრიფინგის მთავარი მიზანი "ჰუმანური ნაბიჯის" გადადგმა და შედეგად, ევროპული სასამართლოს გადაწყვეტილების სისრულეში მოყვანა იყო.

ადამიანის უფლებათა ევროპული სასამართლოს ბოლო გადაწყვეტილებით ირკვევა, რომ სტრასბურგი 19 ნოემბერს სააკაშვილისთვის ადეკვატურ მკურნალობას ითხოვდა.

დოკუმენტი სავარაუდოდ იქამდეა დაწერილი, სანამ იუსტიციის სამინისტრო ექსპრეზიდენტს გორის სამხედრო ჰოსპიტალში გადაყვანას შეთავაზებდა, რადგან სასამართლო ამ გადაწყვეტილებაში ისევ მოუწოდებს სააკაშვილს შეწყვიტოს შიმშილობა, ხელისუფლებას კი ავალდებულებს, რომ მისი ბოლო მდგომარეობა გაითვალისწინოს, "ადეკვატური სამედიცინო მომსახურებით უპასუხოს" და თან 17 ნოემბრის სამედიცინო დასკვნა გაითვალისწინოს. მიხეილ სააკაშვილის ადვოკატი მიუთითებს, რომ სტრასბურგი 17 ნოემბრის სამედიცინო დასკვნაზე საუბრისას სახალხო დამცველის ექსპერტთა ჯგუფს ეყრდნობა, რომლებიც აცხადებდნენ, რომ გლდანის ციხის საავადმყოფო სააკაშვილის საჭიროებებს ვერ პასუხობს და საჭიროა მისი გადაყვანა. თამთა მურადაშვილის თქმით, ომბუდსმენის საბჭოს დასკვნა სტრასბურგს თავად გადაუგზვნეს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მთავრობას მოუწოდებდნენ, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.