ზუგდიდში სახელმწიფო უსაფრთხოების შენობასთან ნაციონალური მოძრაობის ერთ-ერთმა ლიდერმა ანა წითლიძემ აქცია-პერფორმანსი გამართა, სადაც მისი თქმით, მათი თანაბერძოლი ელდარ კეზუა დააკავეს.

"მე აქ მოვედი მშვიდად, წყნარად და სუს-ის უფროსთან გასაუბრება ვითხოვე, რათა პირადად გადამეცა ამანათი, რაც მქონდა — შპრიცები, როგორც სიმბოლო იმისა, რომ სუს მთელი საარჩევნო კამპანიის განმავლობაში მუშაობდა ძველ ბიჭებთან. სანამ ინტერვიუს ვაძლევდი, ჩვენი თანამებრძოლი ელდარ კეზუა დააკავეს", — ამბობს წითლიძე.

On.ge დამატებითი ინფორმაციის მიღებას შინაგან საქმეთა სამინისტროში შეეცადა. მათი პასუხის მიღებისთანავე მასალა განახლდება.

3 ნოემბერს სახელმწიფო უსაფრთხოების სამსახურმა განცხადება გაავრცელა, რომლითაც სოციალურ ქსელებში "რევოლუციურ მოწოდებებს" გამოეხმაურა და მოქალაქეები სასჯელზე გააფრთხილა.

სუს-ის მტკიცებით, ბოლო დროს სოციალურ ქსელებსა და მასობრივი ინფორმაციის საშუალებებში მოქალაქეები განზრახ თუ გაუცნობიერებლად პირდაპირ მოუწოდებენ თანამოაზრეებს "რევოლუციისა და ხელისუფლების დამხობისკენ, მათ შორის ძალადობრივი გზებით". ამის ფონზე უწყება აცხადებს, რომ სახელმწიფო ხელისუფლების დამხობისკენ, მსგავსი მოწოდების შემცველი მასალის გავრცელება, ამავე მიზნით შეიარაღებული მოწოდება სისხლის სამართლის დანაშაულია და ისჯება თავისუფლების აღკვეთით 3 წლამდე.

მას შემდეგ რაც სუს-მა სოციალურ ქსელში რევოლუციური განწყობების შესახებ განცხადება გაავრცელა, მოქალაქეები "რევოლუციას" პოსტავდნენ.