ჯანდაცვის მინისტრის მოადგილე, თამარ გაბუნია ამბობს, რომ მედიკოსების ვაქცინაციის მაჩვენებელი ექიმების შემთხვევაში თითქმის 80%-ს აღწევს. ასე უპასუხა გაბუნიამ მედიკოსების სავალდებულო ვაქცინაციის საჭიროების შესახებ დასმულ კითხვას.

"მედიკოსების ვაქცინაციის მაჩვენებელი ექიმების შემთხვევაში თითქმის 80%-ს აღწევს, სხვა შემთხვევაშიც არის შესაბამისი. ჩვენ მედიკოსებთან გავაგრძელებთ მუშაობას იმ კუთხით, რომ ვაქცინაციის მაჩვენებელი გაიზარდოს და რა თქმა უნდა, მოთხოვნა და ეპიდ-უსაფრთხო გარემო ისევე ეხება მედიკოსს, როგორც ეხება მასწავლებელს, როგორც ეხება პოლიციელს და ნებისმიერ სხვა ჯგუფს", — თქვა გაბუნიამ.

გაბუნიას განცხადებით, ვაქცინაციის გაზრდისთვის ერთადერთი მექანიზმი, რომელიც არის შესაბამისობაში ადამიანების უფლებებთან, არის მწვანე საშვი.

"მწვანე საშვის მექანიზმი ითვალისწინებს გარკვეულ არჩევანს ვაქცინაციას ან სხვა ალტერნატივას. ეს არის ის ერთადერთი მექანიზმი, რომელსაც ჩვენ ვფიქრობთ, რომ არის შესაძლებელი, ეთიკურად გამართული და ამის დამუშავებაზე მიდის მუშაობა", — ამოს გაბუნია.

4 ნოემბრის მონაცემებით, საქართველოში კორონავირუსის 5 206 ახალი შემთხვევა დადასტურდა, გამოჯანმრთელდა — 4 648, ხოლო გარდაიცვალა — 53 ადამიანი.

საქართველოში ამ დროისთვის 3 სხვადასხვა ვაქცინაა ხელმისაწვდომი.

ვაქცინაციის პროგრამაში ჩართვა შეუძლია ყველა მსურველს, 16 წლის ზემოთ. გარდა ამისა, ქრონიკული დაავადებების ან საზღვარგარეთ წასვლის აუცილებლობის შემთხვევაში, აცრას შეძლებენ 12-წლიდან ბავშვებიც.

უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.