პოლიციაში გამოკითხვის შემდეგ, ქუთაისის 90-ე საარჩევნო უბნის კომისიის წევრი, იზა ჩირგაძე, რომელსაც არასამთავრობო ორგანიზაციები და ახლობლები მესამე დღეა ეძებდნენ, მედიასთან პირველად გამოჩნდა და განაცხადა, რომ ის არანაირი საფრთხის წინაშე არ ყოფილა. მისივე თქმით, მუქარას ადგილი არ ჰქონია და სოფელში ნათესავის დასამხარებლად იყო ჩასული.

"არანაირი საფრთხის წინაშე არ ვიყავი. ყველაფერი იყო ნორმაზე, არანაირი დამუქრება, არანაირი ზეწოლა, არანაირი გატაცება. ვიყავი ოჯახის წევრებთან ერთად. სოფელში ვიყავი, ნათესავთან დროებით ჩასული, მოხმარება სჭირდებოდა და მოვეხმარე სოფელში", — ამბობს ის.

კითხვაზე, თუ რატომ ჰქონდა ტელეფონი გათიშული, ჩირგაძე პასუხობს, რომ არ უნდოდა ვინმეს შეეწუხებინა, მათ შორის არც ოჯახის წევრებს.

"გავთიშე ტელეფონი, იმიტომ, რომ არ მინდოდა ვინმეს შევეწუხებინე, ან ნათესავებს, ან ახლობლებს, ან უცხოებს, საერთოდ გავწყვიტე კონტაქტი ყველასთან", — აცხადებს ჩირგაძე.

ჩირგაძე აღნიშნავს, რომ მას არჩევნების გაყალბების იძულებაზე გაკეთებული განცხადების გაკეთების შემდეგ არავინ დაკავშირებია და ვერ დაუკავშირდებოდნენ, რადგან ტელეფონი გამორთული ჰქონდა. ხოლო, შეკითხვაზე, რა მიზნით დაიბარეს ის პოლიციაში დაკითხვაზე და რითი დაინტერესდა გამოძიება, ჩირგაძე ასე პასუხობს:

"მეც ძალიან ანერვიულებული ვიყავი, თავისთავად ყველა ასე იქნებოდა და ანერვიულების ფონზე და ესეთ სიტუაციაში ყველა ადამიანი ასე მოიქცეოდა და ამის გამო".

პირველ ნოემბერს იზა ჩირგაძემ განაცხადა, რომ ქართული ოცნების წარმომადგენელი მმართველი პარტიის სასარგებლოდ ხმების გაყალბებას აიძულებდა. მისი თქმით, ეს არ გაუკეთებია, რის შემდეგაც მასზე ზეწოლას ახდენდნენ, ის კი ენმ-ს დაუკავშირდა და მომხდარის შესახებ ინფორმაცია მიაწოდა. 2 ნოემბერს, პრესკონფერენციის მეორე დღეს, ხატია დეკანოიძემ თქვა, რომ ჩირგაძეს ვეღარ უკავშირდებოდა. მოგვიანებით, განცხადება გაავრცელა არასამთავრობო ორგანიზაცია ISFED-მაც, რომელმაც მისი უფლებების დაცვის მზაობა გამოთქვა, თუმცა, ორგანიზაციაში ამბობდნენ, რომ დილიდან მასთან დაკავშირებას ვერ ახერხებდნენ.

დღეს, 3 ნოემბერს ტელეკომპანია ფორმულამ გაავრცელა ინფორმაცია, რომ ჩირგაძე ერთ-ერთ სოფელში იმყოფებოდა. ნაციონალური მოძრაობის წევრის, ხატია დეკანოიძის თქმით, ამ ცნობის გავრცელების შემდეგ, ის კომისიის წევრთან საუბარს აპირებდა, ამის შესახებ კი სატელეფონო საუბარში თავის მეგობრებს უთხრა. დეკანოიძე აღნიშნავს, რომ მოგვიანებით, მეზობლებისგან ჩირგაძის პოლიციაში გადაყვანის შესახებ შეიტყო და ადგილზე მივიდა, თუმცა ჩირგაძე პოლიციის შენობიდან "გააპარეს". მისივე თქმით, პოლიციიდან გამოსვლის შემდეგ ჩირგაძესთან კომუნიკაცია მხოლოდ რუსთავი 2-სა და იმედის ჟურნალისტებმა შეძლეს.

გაიგე მეტი:

• რა ვიცით კომისიის წევრზე, რომლის თქმითაც, "ოცნების" სასარგებლოდ ხმების გაყალბებას აიძულებდნენ