პირველ ნოემბერს ქუთაისის 90-ე საუბნო საარჩევნო კომისიის წევრმა, იზა ჩირგაძემ ნაციონალური მოძრაობის ერთ-ერთ ლიდერთან, ხატია დეკანოიძესთან ერთად ბრიფინგი გამართა და ისაუბრა, რომ ადგილობრივ თვითმმართველობის არჩევნებზე ქართული ოცნების სასარგებლოდ ხმების გაყალბებას აიძულებდნენ.

მან ბრიფინგზე თქვა, რომ არჩევნების დღეს მმართველი პარტიის წარმომადგენელი უკავშირდებოდა და ხმის მისაცემად სხვა პირადობებით მისული ადამიანების უბანზე შეშვებას სთხოვდა.

"ვცდილობდი, რომ გამეყალბებინა არჩევნები, მაძალებდა ქალბატონი ინგა. ქალბატონი ინგა არის ოცნების წარმომადგენელი. დამირეკა, რომ როცა ვინმე შემოვა, გაატარეო. არცერთი არ გავატარე, ორი შემთხვევა იყო ისეთი, რომ სრულიად არ ემთხვეოდა არცერთ მონაცემებს, უბრალოდ სახელი ემთხვეოდა, სხვა არაფერი. სხვა ადამიანი, სხვა პირადობით [შემოდიოდა], არ მოვაწერინე ხელი, გავუშვი ორივე", — ამბობდა ის.

მისივე განცხადებით, მას შემდეგ, რაც ეს ადამიანები უბანზე არ შეუშვა, ისევ დაურეკეს და უთხრეს, რომ მოთხოვნა შეესრულებინა, თუმცა სხვებიც არ გაატარა.

როგორც ჩირგაძემ აღნიშნა, ის 31 ოქტომბრის საღამოს უბანზე ნაციონალური მოძრაობის წარმომადგენელს დაუკავშირდა, უთხრა, რომ ზეწოლას განიცდიდა და დახმარება სთხოვა.

ადამიანი, ვისაც იზა დაუკავშირდა, მარიამ ნემსაძეა. ის ამბობს, რომ ჩირგაძემ 31 ოქტომბერს საღამოს დაურეკა და მეორე დღეს ქუთაისში McDonald's-ის შენობასთან შეხვედრაზე შეთანხმდნენ, რათა ნაციონალური მოძრაობის შტაბისკენ წასულიყვნენ. თუმცა მისი თქმით, იქ მისულებს ადგილზე ქართული ოცნების წარმომადგენლები დახვდნენ და იზა ჩირგაძის წაყვანა სცადეს. ნემსაძე ვარაუდობს, რომ მათი სატელეფონო საუბარი ისმინებოდა.

"სატელეფონო კომუნიკაციის დროს აშკარა იყო, რომ მისმენდნენ, ჩემი ხმა მიბრუნდებოდა უკან. ვუთხარი [იზას], რომ სადღაც 15 წუთში ვიქნები ქუთაისში და McDonald's-ის შენობაში დამელოდე-მეთქი. სადღაც ორ წუთში მირეკავს იზა ისევ მე, მეუბნებიან [ქართული ოცნების წარმომადგენლები], რომ McDonald's-თან ვართ მოსული და ახლავე გამოდი, უნდა წამოგვყვე ოცნების შტაბშიო", — აღნიშნა მან.

მისი თქმით, ჩირგაძე, კვალის აბნევის მიზნით, სავაჭრო ცენტრ გრანდმოლში შევიდა. ნემსაძის განცხადებით, მოგვიანებით იქ მისულს ქართული ოცნების ის წარმომადგენლები დახვდნენ, რომლებიც არჩევნების დღეს უბანზეც იმყოფებოდნენ.

"გავექანე იზასკენ, რომ არ წაერთმიათ ჩვენთვის. ვიცოდი, რისთვისაც იყვნენ მოსულები. მოვახერხეთ იმდენი, რომ ჩემს კუთვნილ ავტომობილთან მივედით და ჩავიჯინეთ", — აცხადებს ნემსაძე.

კომისიის წევრის თქმით, ქართული ოცნების წარმომადგენლები მანქანასთან პოლიციელებთან ერთად მივიდნენ და იზას სთხოვდნენ, რომ გაჰყოლოდა. თავად ჩირგაძის თქმითაც, ისინი პოლიციას ეუბნებოდნენ, რომ ის მანქანაში მისი ნების საწინააღმდეგოდ იჯდა.

"საპატრულო პოლიციის დაცვის უფროსებს ისეთი ულტიმატუმი მიუყენა, რომ თითქოს მომიტაცეს. ვუთხარი, არავის არ მოვუტაცებივარ, ჩემი ნებით, სურვილით ჩავჯექი მანქანში-მეთქი", — განაცხადა მან.

სწორედ ამ ინციდენტის შემდეგ გამართეს ბრიფინგი ნაციონალური მოძრაობის შტაბში, სადაც ჩირგაძემ აღნიშნა, რომ ზეწოლას განიცდიდა არა მხოლოდ ის, არამედ მისი ოჯახის წვერებიც. როგორც მან თქვა, ეს ადამიანები მისული იყვნენ ოჯახში და დაურეკეს მის დასაც. ჩირგაძის თქმით, მათ უკავშირდებოდა ქართული ოცნების წარმომადგენელი, ვინმე ირმა.

"ჩემს დას უთხრეს, რომ შენი და არის ძალიან დიდ საფრთხეშიო. ჩემი და, რა თქმა უნდა, დამიკავშირდა, ცოტა დაძაბული იყო და შეშინებული. მითხრა, შენი ქმრის ტელეფონის ნომერსაც ითხოვდნენ და მე არ მივაწოდეო", — თქვა მან.

გვიან ღამით, გირჩი — მეტი თავისუფლების წევრმა, იმედა კლდიაშვილმა მომხდარი სახელმწიფო უსაფრთხოების სამსახურის შენობასთან გააპროტესტა. ის ადგილზე მანქანით მივიდა და Facebook-ის პირდაპირ ეთერში ისაუბრა, რომ განცხადების გაკეთების შემდეგ სახელმწიფო უწყებებმა იზა ჩირგაძე დააშინეს, რის გამოც ის კომენტარს აღარ აკეთებდა. კლდიაშვილი იმავე ღამეს სუს-ის შენობასთან დააკავეს და გუშინ 2 000-ლარიანი ჯარიმის სანაცვლოდ გაათავისუფლეს.

პრესკონფერენციის მეორე დღეს, 2 ნოემბერს, ნაციონალური მოძრაობის ქუთაისის მერობის კანდიდატმა, ხატია დეკანოიძემ მთავარი არხის ეთერში თქვა, რომ მას შემდეგ, რაც პირველ ნოემბერს იზა ჩირგაძე მათი შტაბიდან სახლში წავიდა, მასთან დაკავშირება ვეღარ ხერხდება. დეკანოიძის თქმით, დაგეგმილი იყო, როგორც საერთაშორისო ორგანიზაციის, ასევე სამართლიანი არჩევნების წარმომადგენლებთან შეხვედრა. მისივე განცხადებით, აღნიშნულთან დაკავშირებით ინფორმირებულია სახალხო დამცველიც.

2 ნოემბერს განცხადება გაავრცელა სამართლიანმა არჩევნებმაც. ორგანიზაციამ მზადყოფნა გამოთქვა, დაიცვას იზა ჩირგაძის უფლებები და აღნიშნა, რომ მასთან დაკავშირებას 2 ნოემბრის დილიდან ვეღარ ახერხებედნენ.

ISFED მიიჩნევს, რომ ჩირგაძისა და მისი ოჯახის უსაფრთხოებასა და ზეწოლისგან თავისუფალი გარემოს უზრუნველყოფაზე სრული პასუხისმგებლობა ეკისრებათ სამართალდამცავ ორგანოებს. მათ მოუწოდეს შესაბამის უწყებებს, დროულად გამოიძიონ საუბნო საარჩევნო კომისიის წევრის მიერ გაჟღერებული დანაშაულის ნიშნების შემცველი ფაქტები და მიიღონ დროული ზომები იზა ჩირგაძეზე სავარაუდო ზეწოლის აღსაკვეთად.

უკვე დღეს, 3 ნოემბერს ფორმულამ გაავრცელა ინფორმაცია, რომ იზა ჩირგაძე ერთ-ერთ სოფელში იმყოფება. მედია სოფლის დასახელებას არ ასაჯაროებს და მეზობლებზე დაყრდნობით აცხადებს, რომ ჩირგაძე იქ, სავარაუდოდ, ოჯახთან ერთად არის.

მთავარი არხის განცხადებით კი, სავარაუდოდ, სამოქალაქო ტანსაცმელში ჩაცმული სამართალდამცველები დღეს იზა ჩირგაძის საცხოვრებელ სახლთან იმყოფებოდნენ. On.ge აღნიშნულთან დაკავშირებით შინაგან საქმეთა სამინისტროს დაუკავშირდა, თუმცა მათგან კითხვებზე პასუხი არ მიგვიღია.

რაც შეეხება ქართული ოცნების პოზიციას, მმართველი პარტიის აღმასრულებელი მდივნის, მამუკა მდინარაძის განცხადებით, იზა ჩირგაძის მიერ გავრცელებული ინფორმაცია სიმართლეს არ შეესაბამება. მან მოუწოდა მედიას, დაინტერესდნენ, რატომ გაახსენდა ჩირგაძეს ეს "მესამე დღეს", ნაცვლად იმისა, რომ იმავე დღეს გაეპროტესტებინა. მას მალევე უპასუხა ხატია დეკანოიძემ და თქვა, რომ მდინარეძე იტყუება და იზა ჩირგაძემ საუბნო საარჩევნო კომისიის თავმჯდომარეს არჩევნების პროცესშივე მიმართა.