ჯანდაცვის მინისტრმა, ეკატერინე ტიკარაძემ განაცხადა, რომ რეგულირების სააგენტოს დაავალებს ციხის კლინიკის შესწავლას. ამ გადაწყვეტილებას ტიკარაძე მაღალი საზოგადოებრივი ინტერესით ხსნის.

"გამომდინარე იქედან, რომ არის ძალიან მაღალი ინტერესი საზოგადოებრივი, თუ რომელ ტიპს შეესაბამება ეს კლინიკა, რა ხარისხის არის ეს კლინიკა, მე დავავალებ რეგულირების სააგენტოს, რომ მოახდინოს განმეორებითი შესწავლა ამ კლინიკის და დადოს შესაბამისი დასკვნა კლინიკის მზაობის შესახებ და უკვე ეს გასაჯაროვდეს. აღარ იყოს კითხვები იმასთან დაკავშირებით, წარმოადგენს თუ არა ეს კლინიკა რომელიმე პაციენტისთვის რისკს.

თუ ეს კლინიკა არ აკმაყოფილებს მიხეილ სააკაშვილისთვის საჭირო მოთხოვნებს, მაშინ რისკის ქვეშ დგანან სხვა პაციენტებიც და ჩემი აზრით მნიშვნელოვანი არის, რომ ყველა პაციენტი იყოს თანაბრად დაცული", — განაცხადა ჯანდაცვის მინისტრმა.

ტიკარაძეს ჰკითხეს სახალხო დამცველის მიერ მომზადებულ დასკვნაზეც, რომლის მიხედვითაც პენიტენციური სამსახურის მე-18 სამედიცინო დაწესებულება სრულად არ შეესაბამება ექიმთა კონსილიუმის რეკომენდაციებს. ასევე, არსებობს რისკები ექსპრეზიდენტის უსაფრთხოებაზეც. ჯანდაცვის მინისტრის განცხადებით, კლინიკას აქვს როგორც დოპლერის, ისე კომპიუტერული ტომოგრაფიის აპარატი.

"უსაფრთხოებაზე მე ვერ ვისაუბრებ, სხვამ უნდა გააკეთოს კომენტარი. რაც შეეხება იმ კვლევებს, რომლებიც არის გაცემული ექიმების მხრიდან, ეს არის დოპლერი, ეს არის კომპიუტერული ტომოგრაფია, ამ კლინიკას აქვს როგორც დოპლერის აპარატი, — რამდენადაც ვიცი, რამდენიმე ხანში თვითონ ციხეში ჩაუტარდება პაციენტს ეს კვლევა, ვინაიდან ეს არის მობილური დანადგარი, რომლის გადაადგილება შესაძლებელი არის და პენიტენციური სამსახური ამას უზრუნველყოფს — რაც შეეხება კომპიუტერულ ტომოგრაფს, კომპიუტერული ტომოგრაფი აქვს ამ კლინიკას", — განაცხადა ტიკარაძემ.

მიხეილ სააკაშვილის ადვოკატებმა გუშინ, 24 ოქტომბერს საგანგებო ბრიფინგი გამართეს და განაცხადეს, რომ პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის. მისი ინფორმაცით, ე.წ. ციხის საავადმყოფოში არ არის მაგნიტორეზონანსული და კომპიუტერული ტომოგრაფიის აპარატები, დოპლერი და ა.შ.

მიხეილ სააკაშვილის ადვოკატებმა საჯაროდ მიმართეს ჯანდაცვის მინისტრის, ეკატერინე ტიკარაძეს და სთხოვეს განმარტება — არის თუ არა ე.წ. ციხის საავადმყოფო იმ ტიპის მულტიფუნქციური დაწესებულება, რომელიც განსაზღვრა კონსილიუმმა სააკაშვილის სამკურნალოდ. გარდა ამისა, გვარამია მიმართავს სახალხო დამცველს და შეისწავლოს, შეესაბამება თუ არა ე.წ. ციხის საავადმყოფო C კატეგორიის, მულტიფუნქციური კლინიკის სტანდარტებს.

იმავე დღეს, სახალხო დამცველის რწმუნებულებმა შეისწავლეს მე-18 სამედიცინო დაწესებულება და განაცხადეს, რომ იგი სრულად არ შეესაბამება ექიმთა კონსილიუმის რეკომენდაციებს. ასევე, არსებობს რისკები ექსპრეზიდენტის უსაფრთხოებაზეც.

დღეს, იუსტიციის მინისტრმა, რატი ბრეგაძემ განაცხადა, რომ სახალხო დამცველის დასკვნაში ფაქტობრივ შეცდომა იყო. კონკრეტულად, ბრეგაძის თქმით, ციხის საავადმყოფოში ექიმ-რეანიმატოლოგი არის.

სახალხო დამცველის მიერ გუშინ მომზადებულ დასკვნაში წერია: "დაწესებულებაში ამჟამად არ მუშაობს ექიმ-რეანიმატოლოგი, თუმცა ადმინისტრაციის განმარტებით, უახლოეს პერიოდში ელოდებიან შესაბამის სპეციალისტებს".

ბრეგაძის ბრალდებას უპასუხა სახალხო დამცველის მოადგილემ, გიორგი ბურჯანაძემ. მისი თქმით, 24 ოქტომბერს სასჯელაღსრულების დაწესებულებაში არავინ იცოდა, რომ იქ რეანიმატოლოგი ჰყავდათ. ბურჯანაძე ამბობს, რომ ციხის კლინიკაში რეანიმატოლოგი გუშინ დანიშნეს.