პრემიერმინისტრ ირაკლი ღარიბაშვილის მრჩეველი ვაზილ ჰუდაკის განცხადებით, მისი პირადი განცდაა, რომ საქართველოში დიდი ჰიდროენერგეტიკული პროექტების დრო დასრულდა. მისივე თქმით, ამას ამგვარი პროექტების მიმართ ადგილობრივების წინააღმდეგობის გამო ფიქრობს. Forbes Talks-ში ის, ასევე, ამბობს, რომ მომავალს უფრო მცირე ზომის ჰიდროელექტროსადგურების მშენებლობაში და ასევე, განახლებადი ენერგიების განვითარებაში ხედავს.

"ჩემი პირადი განცდაა, რომ საქართველოში დიდი ჰიდროენერგეტიკული პროექტების დრო დასრულებულია, ამას ვამბობ იქიდან გამომდინარე, რაც ხდება ქვეყანაში და რამდენად დიდია ადგილობრივი წინააღდმეგობა ამგვარი პროექტების მიმართ. პოტენციურად, მომავალს ვხედავ უფრო მცირე ზომის ჰიდროელექტროსადგურების მშენებლობაში და ასევე, განახლებადი ენერგიების განვითარებაში. განსაკუთრებით, მზის და ქარის ენერგიების მიმართულებით, ამისთვის სისტემური ბალანსის მიღწევა დაგვჭირდება", — აცხადებს ჰუდაკი.

მისივე თქმით, დიდი პროექტი, რომელშიც ის ახლა არის ჩართული საქართველოშ ენერგიის შენახვის სისტემის განვითარებას ეხება, რომელიც დივერსიფიცირებული იქნება. ჰუდაკს მიმაჩნია, რომ მომავალში, ინვესტორს, რომელიც საქართველოში მზის და ქარის ენერგიაში ინვესტირებით დაინტერესდება, ასეთი სისტემის აშენება უნდა დაევალოს, სისტემა, რომელიც ელექტროენერგიას შეინახავს, როცა მიწოდება იქნება მაღალი და ამით სისტემურ ბალანსს მივიღებთ.

ის, ასევე, ფიქრობს, რომ საქართველო სლოვაკეთის მსგავსი ქვეყანაა, სლოვაკეთის ეკონომიკური განვითარების მთავარი ხაზი კი დღეს ექსპორტია, მშპ-ს 85% ექსპორტზე მოდის.

"საქართველოსაც, ჩემი აზრით, მსგავსი პოტენციალი და მომავალი აქვს, ამას კი ნამდვილად სჭირდება პირდაპირი უცხოური ინვესტიციები", — ამბობს პრემიერმინისტრის მრჩეველი.

22 სექტემბერს ცნობილი გახდა, რომ ENKA საქართველოს მთავრობასთან ხელშეკრულებას წყვეტს და ნამახვანჰესს აღარ ააშენებს.

17 სექტემბერს ნამახვენჰესის მშენებლობის მოწინააღმდეგეებმა 3-თვიანი დახურული მოლაპარაკებების შემდეგ ხელისუფლებასთან მედიაციის პროცესი დატოვეს. მედიაცია პარტნიორ ქვეყნებთან ერთად მიმდინარეობდა. მთავრობამ ნამახვანჰესთან დაკავშირებულ დისკუსიებში ევროკავშირის ენერგეტიკული გაერთიანების წარმომადგენლის ჩართვის შესახებ გადაწყვეტილება 24 აპრილს გაასაჯაროვა.

რიონის ხეობის აქტივისტებისგან განსხვავებით, ნამახვანჰესის კასკადის აუცილებლობასა და წარმატებაზე საუბრობდა ხელისუფლება. ეკონომიკის სამინისტროს არაერთხელ განუცხადებია, რომ ეს პროექტი ქვეყნის ენერგოდამოუკიდებლობისკენ და უსაფრთხოებისკენ ერთ-ერთი აუცილებელი ნაბიჯია.