ექსპრეზიდენტ მიხეილ სააკაშვილის ექიმი, ნიკოლოზ ყიფშიძე აცხადებს, რომ სააკაშვილი ჰოსპიტალიზაციაზე თანახმაა, მაგრამ პრობლემა არის, სად, როგორ და როდის გადაიყვანენ. მისივე თქმით, ხვალ უკვე შეიძლება იფიქრონ კლინიკაში გადაყვანაზე, მაგრამ ეს საკითხი ჯერ კიდევ კითხვის ნიშნის ქვეშაა.

როგორც ყიფშიძე ამბობს, გადაიყვანენ საავადმყოფოში თუ არა, სააკაშვილი შიმშილობას მაინც გააგრძელებს.

"გლდანში გადაყვანაზე არის მთელი რიგი პრობლემები და პირველ რიგში, ეს არის უსაფრთხო. უსაფრთხოების ექსპერტები მიიჩნევენ, რომ ძალიან უსაფრთხო გარემო არ იქნება", — განაცხადა მან ჟურნალისტებთან.

ყიფშიძემ აღნიშნა ისიც, რომ სააკაშვილს დღეს ტესტები გაუკეთა, რომლის შედეგებიც დამაკმაყოფილებელია. მისივე თქმით, დღეს ციხის ადმინისტრაციამ შენობასთან რეანომობილი მიიყვანა, რომ საჭიროების შემთხვევაში სააკაშვილს დახმარება აღმოუჩინონ.

ექსპრეზიდენტის ექიმი და ადვოკატები აცხადებენ, რომ ის ჰოსპიტალიზაციაზე თანახმაა, მაგრამ არა ციხის სამკურნალო დაწესებულებაში. თუმცა, იუსტიციის მინისტრი ამბობს, საჭიროების შემთხვევაში, მას არა რომელიმე საავადმყოფოში, არამედ სწორედ პენიტენციური სამსახურის სამკურნალო დაწესებულებაში გადაიყვანენ. მას შემდეგ, რაც სააკაშვილის ადვოკატმა, ბექა ბასილაიამ განაცხადა, რომ ეს არის მინიშნება პროვოკაციაზე, ბრეგაძემ განმარტა, რომ ყველა პატიმრის მიმართ თანასწორი მიდგომა აქვთ.

19 ოქტომბერს, რატი ბრეგაძე აცხადებდა, რომ სააკაშვილის თანხმობის შემთხვევაში, ექიმთა კონსილიუმის ყველა რეკომენდაცია შესრულდებოდა. ჯანდაცვის სამინისტროს ბაზაზე შექმნილი ექიმთა მულტიფუნქციური ჯგუფის წევრებმა მიხეილ სააკაშვილი მონახულების შემდეგ მისი პრევენციული ჰოსპიტალიზაციის რეკომენდაციას გასცა.